استراليا کرېکټ لوبډلې يوۀ پښتانۀ ته مخه کړه

د خپريدو وخت: 10:37 گرینویچ - جمعه 02 نومبر 2012 - 12 لړم 1391

فواد احمد لیگ سپنر دى او د بالېنگ ډيل ډول يې ډېر د سويلي افريقا عمران طاهر ته ورته دي.

فواد احمد د ډيورنډ کرښې ته نژدې اوسېدۀ خو اوس يې په استراليا کې سياسي پناه اخيستې او د کرېکټ دومره ښه لوبغاړى دى چې ملي لوبډلې ورغوښتى چې تمرين ورسره وکړي.

احمد دوه کاله وړاندې استراليا ته په ويزه ورغى او هلته يې پناه واخيسته.

د دۀ د پناه قضيه لا څرگنده نه ده خو لوبه يې دومره د پام وړ وه چې د استراليا ملي لوبډلې ورغوښتى چې منډه جوړونکو ته يې بالېنگ وکړي.

فواد احمد لیگ سپنر دى او د بالېنگ ډيل ډول يې ډېر د سويلي افريقا عمران طاهر ته ورته دي.

عمران طاهر اصلآ د پاکستان اوسېدونکى و خو اوس د سويلي افريقا تابعيت لري او په ملي لوبډله کې يې لوبه کوي.

فواد احمد د سډني يوې ورځپاڼې ته وويل: " خوښ يم چې د استراليا ملي لوبډلې ته يې وربللى يم. دا د هغوى لپاره هم ښه ده او زما لپاره هم. زما ونه ، د توپ اچولو طريقه او د گوگلي ډول عمران طاهر ته ډېر ورته دي".

د استراليا د پيل يوۀ لوبغاړي ايډ کاوين له کريکټ چارواکو غوښتي و چې فواد احمد د تمرين ډگر ته پرېږدي چې لوبغاړي ورسره لوبه وکړي او چلونه يې زده کړي.

ايډ کاوين استراليايي رسنيو ته وويل: " که د خپلې مخالفې غاړې له يوۀ تکړه بالر سره تر سيالۍ وړاندې د لوبې چانس نه لرئ نو غوره دا ده چې هغه ورته کس پيدا کړئ"

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .