افغان اولمپیک کمېټه وزلوبه ټول هېواد ته رسوي

د خپريدو وخت: 18:40 گرینویچ - جمعه 21 ډسمبر 2012 - 01 مرغومی 1391

وزلوبه د افغانستان يوه خورا لرغونې لوبه بلل کېږي.

د افغانستان د اولمپيک ملي کمېټه وايي وزلوبه په ټول افغانستان کې سراسري کېدونکې ده.

هغه سيالۍ چې پرون د دغې لوبې ملي لوبډلې ته د لوبغاړو د غواروي په موخه په کابل کې پيل شوې، د شمالي ولايتي پر لوبډلو سربېره په کې د ختيځو ولايتونو ننگرهار، کونړ او لغمان لوبډلو هم برخه اخیستې ده.

اړوند چارواکي هيله لري چې روان کال ته د ټولو ۳۴ ولايتو د وزلوبې لوبډلې په دغو سياليو کې د ګډون په موخه کابل ته ور وبولي.

وزلوبه چې د افغانستان يوه په زړه پورې او خورا لرغونې لوبه بلل کېږي، د اولمپيک د ملي کمېټې د چارواکو په وينا اوس له شمالي ولايتونو څخه د دغه هېواد لوېديځ، ختيځ او سويل ته لاره پرانېزي.

اړوند چارواکي د خپلې خبرې پخلى په دې سره کوي، چې جمعې ورځې (دسمبر/ ۲۱) په کابل کې د دغې لوبې ملي لوبډلې ته د غوراوي کومې سيالۍ پيل شوې، نو د افغانستان د دريو ختيځو ولايتونو ننگرهار، کونړ او لغمان لوبډلو هم په کې برخه اخیستې ده.

د افغانستان د اولمپيک د ملي کمېټې وياند مجيب الله رحماني وايي هيله لري چې را روان کال ته د ټولو ۳۴ ولايتونو لوبډلې په دغو سیالیو کې برخه واخلي.

ښاغلي رحماني وويل دغو سياليو ته د کندهار او هرات په ګډون د ۱۶ ولايتونو د اوزلوبې لوبډلې رابلل شوې وې، خو وايي د یخنیو او ځينو نورو لاملونو له کبله يوازې د اتو ولايتونو لوبډلو په دغو سياليو کې برخه اخیستې ده.

دغه لرغونې لوبه د تاريخ په اوږدو کې د هرې واکمنۍ پر مهال شته وه، خو د محمد ظاهر شاه د واکمنۍ پر مهال د نوي کال او نورو جشنونو يوه نه هېرېدونکې برخه هم وګرځېده.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .