د ایشانت شرما ۷ ویکټو هند بریالی کړ

Image caption ایشانت شرما ۷ لوبغاړي وسوځول او د لوبې غوره لوبغاړی ونومول شو

د هندوستان او انګلستان کرېکټ لوبډلو تر منځ دویمه پنځه ورځنۍ لوبه هندوستان د ۹۵ منډو په توپير وګټله.

دغه لوبه د لندن په تاریخي لوبغالي لارډز کې ترسره شوه.

د هند لوبډلې په خپل لومړي وار کې د ځوان لوبغاړي اجنکیا رهانې د سلیزې پر مټ ۲۹۵ منډې جوړې کړې.

د انګلستان په توپ اچوونکو کې جیمز انډرسن تر نورو ډېر وځلېد او څلور لوبغاړي يې وسوځول.

په ځواب کې بیا د انګلستان لوبډلې په خپل لومړي نوبت کې ۳۱۹ منډې جوړې کړې او وسوځېدل.

د انګلستان په توپ وهوونکو کې هم د دوی ځوان لوبغاړی بلنس تر نورو ډېر وځلېد او سلیزه یې پوره کړه.

بلنس تر دې وړاندې په لومړۍ پنځه ورځڼۍ لوبه کې هم سلیزه وهلې وه.

د هندوستان تېز توپ اچوونکي بونېشور کمار شپږ انګلیس لوبغاړي وسوځول.

د انځور حقوق Reuters
Image caption د انګلستان کپتان الېسټر کک په دغه لوبه کې ونه ځلېد

د هند لوبډلې په دویم وار کې د ټولو لوبغاړو پر سر ۳۴۲ منډې وکړې او انګلستان ته یې د ۳۱۸ منډو هدف وټاکه.

د لوبې په څلورمه ورځ د هدف په تعقیب کې د انګلستان د لوبډلې پیل ښه نه وو او یوازې په سلو منډو یې څلور لوبغاړي وسوځېدل.

د لوبې په وروستۍ ورځ معین علي او جوی رووټ ښه لوبه پیل کړه او په ګډه یې د پنځمې ویکټې لپاره ۹۹ منډې وکړې.

د غرمنۍ له دمې شيبې وړاندې معین علي وسوځېد او له هغې وروسته بیا نو د انګلستان لوبډلې هېڅ توپ وهونکی هم سم ونه لوبېد او پرله پسې ژر ژر وسوځېدل.

په دویم وار کې د هندوستان تېز توپ اچوونکي ایشانت شرما ۷ لوبغاړي وسوځول او له همدې کبله وه چې د لوبې غوره لوبغاړی ونومول شو.

د دواړو هېوادونو تر منځ د ټېسټ لوبو د دغې لړۍ لومړۍ هغه یې چې په ناټنګم ښار کې ترسره شوې وه برابره پای ته رسېدلې وه.

ورته مطالب