کرېکټ: افغانستان اسیايي لوبو کې د سپینو زرو مډال وګاټه

د انځور حقوق AFP
Image caption افغانستان تېر ځل هم د ۲۰۱۰ کال په اسیايي لوبو کې د سپینو زرو مډال ګټلی و.

د افغانستان د کرېکټ الف لوبډلې د ۲۰۱۴ اسیايي لوبو د شل اوریزو کرېکټ سیالیو پاېلوبه کې خپل میچ سریلنکا ته بایلود خو د سپینو زرو مډال یې خپل کړ.

نن (جمعه، اکتوبر ۳مه) په پایلوبه کې پچه سریلکنا وګټله او بالنګ ته په مناسب پېچ یې لومړی خپله د توپوهنې پرېکړه وکړه.

د افغانستان بالرانو د سریلنکا د ملي لوبډلې د پیاوړي توپ وهونکو په وړاندې په زړه پورې بالنګ نندارې ته وړاندې کړ.

د سریلنکا ټوله لوبډله چې په کې د ملي ټیم ترانګا، چندیمل، تېرامانې او جیون مینډیس په څېر تکړه توپوهونکي شامل و، په ۱۹،۱ اورونو کې یوازې پر ۱۳۳ منډو وسوځېده.

د افغانستان له خوا لوبډلمشر محمد نبي په زړه پورې بالنګ نندارې ته وړاندې کړ او په ۳،۱ اورونو کې یې د ۱۸ منډو په بدل کې ۴ وېکټې تر لاسه کړې.

د نبي تر څنګ ګلبدین نایب هم ښه بالنګ وکړ او په ۴ اورونو کې یې یوازې ۱۶ منډې ورکړې او د سریلنکا ۲ لوبغاړي یې وسوځوله.

د سریلنکا له خوا تېرامانې په ۳۷ توپونو ۵۷ او چندیمل په ۲۷ توپونو ۳۳ منډې وکړې.

داسې برېښېده چې د افغانستان توپوهونکي د ۱۳۴ منډو هدف د ترلاسه کولو وړتیا لري.

خو دوی د سریلنکا د پیاوړو توپ اچونکو مخې ته و نه شو درېدلی.

د افغانستان توپ وهونکو یو ځل بیا نهیلې کونکی بیټنګ وکړ او ټول ټیم په ۱۷،۴ اورونو یوازې پر ۶۵ منډو وسوځېد.

تر ټولو ډېری منډې په کې د نجیب تره کي په ۱۶ توپونو ۱۷ منډې وې.

په پایلوبه کې د بایلاد سربېره افغانستان په نیمه پایلوبه کې د هانګ کانګ لوبډلې ته ماته ورکړې وه او په دې ترتیب یې په اسیايي لوبو کې د سپینو زرو مډال وګاټه.

افغانستان تېر ځل هم د ۲۰۱۰ کال په اسیايي لوبو کې د سپینو زرو مډال ګټلی و.

هغه مهال یې نیمه پایلوبه کې پاکستان ته ماته ورکړې وه خو پایلوبه یې له سختې سیالۍ وروسته بنګله دیش ته بایللې وه.