فيفا کې د فساد په تړاو تازه اسناد موندل شوي

د انځور حقوق BBC World Service
Image caption جک وارنر چې اوس ترې د امريکا د فدرالي پلټنو اداره د فساد په اړه تحقيقات کوي ټولې ادعاوې رد کړي، ويلي يې دي چې ناسم کار يې نه دی کړی.

بي بي سي داسې اسناد ترلاسه کړي، چې ښيي هغه لس ميليونه ډالر چې د پخواني مشر سپ بلاټر د مرستيال جک وارنر تر کنټرول لاندې حساب ته اچول شوي، څنګه لګول شوي دي.

دغه پيسې چې د جنوبي افریقا له لوري د ۲۰۱۰ کال د نړیوال جام له کوربتوب وړاندې ورکړای شوې وې ټاکل شوې وه په کارابین حوزه کې د افريقايي ټولنې د فوټبال د ودې لپاره ولګول شي.

خو تازه اسناد ښيي، چې ښاغلي وارنر دا د نغدو پيسو وېستلو، شخصي پورونو او پيسو وينځلو په توګه کارولي دي.

د دغو پيسو نژدې نيمايي يې د ښاغلي وارنر په هېواد کې زنځيره يي سوپر مارکېټونو ته ورکړای شوي دي.

امريکايي څارنوالان وايي د وارنر حساب ته د اچول شويو پيسو يوه لويه برخه بېرته په ځايي پيسو اړول شوي او ښاغلي وارنر ته ورکړای شوي دي.

خو ۷۲ کلن جک وارنر چې اوس ترې د امريکا د فدرالي پلټنو اداره د فساد په اړه تحقيقات کوي ټولې ادعاوې رد کړي، ويلي يې دي چې ناسم کار يې نه دی کړی.

د فوټبال نړیوالې ادارې فيفا ويلي دوی له پلټنو سره مرسته کوي.

تر دې وړاندې ښاغلي وارنر خبرداری ورکړی و، چې د فوټبال په نړیواله اداره فيفا کې به د فساد په اړه هر څه ووايي.

په فيفا کې د فساد رسوايي شاوخوا شپږ ورځې وړاندې د دغې ادارې د اوو لوړپوړو کسانو په نيولو نوي پړاو ته داخل شوه.

دغه کسان د امريکا د فدرالي ادارې د پوليسو په غوښتنه نيول شوي دي.

د امريکا د پلټنو فدرالي اداره وايي په فيفا کې د شاوخوا ۱۵۰ ميليونه ډالرو بډو په اړه خبر ور رسېدلی دی.

د دغه کړکېچ په پراخېدو او د فوټبال پر مشر سپ بلاټر له نيوکو وروسته ښاغلي بلاټر له بیا ټاکل کېدو يوازې پنځه ورځې وروسته له دندې د لرې کېدو اعلان وکړ.