اروپايي ټولنه

اروپايي ډيپلوماټانو پر ایران غږ وکړ چې له دغه هېواد سره د اټومي تړون خبرې بې پایه نه دي. د ایران او شپږو قدرتونو اټومي خبرې دې تړون ته د امریکا د بیا ستنېدلو او د تړون پر ژمنو د ایران د بیا درېدو لپاره له دریو میاشتو راهیسې روانې دي. د ایران ټاکنو کې د ابراهیم رییسي بریالیتوب سره ډېر اټومي تړون ته د ایران له ستنېدو ناهیلي شوي دي.

د افغانستان لپاره د اروپایي ټولنې ځانګړی چارسمبالی توماس نیکلاسن- چې تازه یې له پاکستاني چارواکو سره کتلي- وايي له افغانستان د پاتې بهرنیو ځواکونو د وتلو چارې ته په کتو د افغان سولې لپاره وخت په پای ته رسېدو دی. هغه د پاکستان رول ته په اشاره وايي، دا هېواد پوهیږي چې د افغان مسلې سوله ییز حل یې په ګټه دی خو اسلام اباد باید پر طالبانو خپل ټول اغېز واچوي چې د سیاسي جوړجاړي لپاره خپل لیکلي وړاندیزونه وړاندې کړي.

طالبانو په دوو جلا اعلامیو کې بهرنیو دیپلوماتانو، د بشري برخو کارکوونکو، د بهرنیو ځواکونو افغان ژباړونکو او ساتونکو ته له خپله اړخه د امنیت د خوندیتوب ډاډ ورکړی دی. خو د طالبانو په اعلامیه کې دا هم راغلي چې د بهرنیو ځواکونو افغان کارکوونکي باید "په خپلو تېرو کړنو پيښمانه واوسي" او د راتلونکي لپاره بیا داسې لاره غوره نه کړي چې د دوی په وینا له "اسلام او هېواد سره خیانت بلل کېږي".

ډنمارک کې د څارګرۍ یو سازمان تورن شوی چې له متحد ایالتونو سره یې د جرمني د لومړۍ وزیرې انګیلا مېرکل په ګډون د اروپايي مشرانو خلاف جاسوسۍ کې همکاري کړې ده. د ډنمارکي رسنیو لخوا د رپوټونو له مخې د دغه هېواد د دفاعي خدماتو سازمان (ایف يي) له ۲۰۱۲ تر ۲۰۱۴ کال- هغه مهال چې بارک اوباما ولسمشر و- د امریکا د ملي امنیت ادارې (این اېس اې) سره مرسته کړې چې د اروپايي مشرانو تلیفوني او انټرنیټي تماسونه ثبت او واوري.

د سوریې ولسمشر بشار اسد د څلورم ځل لپاره د دغه هېواد ولسمشرۍ ټاکنو ګټونکی اعلان شو. د سوریې د پارلمان مشر حمود صباغ خبري غونډې ته وویل، ښاغلي اسد ۹۵.۱ سلنه رایې ګټلې دي.

روپايي ټولنې پرېکړه کړې چې د بېلاروس هوايي الوتنې شرکتونه نه شي کولی چې د دې ټولنې د غړو هېوادونو له هوايي حریمه کار واخلي. دا پرېکړه وروسته له هغه وشوه چې پر تېره یکشنبه د یوه منتقد خبریال د نیولو لپاره یوه الوتکه مېنسک کې ناستې ته اړ کړل شوه.

د بیلاروس د هوايي ځواک لخوا لیتوانیا ته د یوې روانې سپرلۍ الوتکې جبري کینولو لویدیځ هېوادونه غوسه کړي دي. د بیلاروس هوايي ځواک دا سپرلۍ الوتکه د بم د خبرداري په پلمه د دې لپاره مېنسک هوايي ډګر کې کیناستو ته اړیسته چې پکې د خپل حکومت یو سپور نیوکګر ژورنالیست او فعال 'رومن پروتاسویچ' ونیسي.

بریتانیا له فرانسې سره په سمندري حدودو کې د کبانو د ښکار سیمې پر سر له لانجې وروسته جرسي ټاپو ته دوه شاهي سمندر ساتونکې بېړۍ استولې دي. د بریتانیا لومړي وزیر بورېس جانسن ویلي، د فرانسې لخوا جرسي ټاپو ته د څه باندې ۱۰۰ کب نیونکو بېړیو استول "هېڅ توجیه نه لري".

د ایټالیا سمندري ځواکونو خپل یو افسر یوه روسي پوځي چارواکي ته د پټو اسنادو د ورکولو پر مهال نیولی دی. د ایټالیا نظامي پولیس وايي دغه افسر یې د جاسوسۍ او د ملي امنیت په تړاو د درنو جرمنو په تور نیولی دی.