سایبري بریدونه

د امریکا عدلیې وزارت اعلان کړی چې د تېر کال په یوه سایبري برید کې د نږدې ۳۰ جګپوړو امریکايي څارنوالانو او د هغوی د دفترونو برېښنالیکونه هک شوي دي. دا سایبري برید د سولروینډز په نوم د سافټویر په کاروونکو شوی او د امریکا د حکومت خلاف د سایبري جاسوسۍ تر ټولو ناوړه برید بلل شوی و.

یوه ایرانۍ ډله چې پر خلکو یې د انټرنیټي بریدونو په موخه ځان بریتانیا کې میشته اکاډمیکه ډله معرفې کوله کشف شوې ده. دا ډله د لندن پوهنتون ویبپاڼې ته هم د مالوماتو د غلا کولو په هڅه کې ورننوتې وه. دا ډله پر انټرنیټ د امنیتي کمپنۍ پروف پواینټ له خوا کشف شوې او هغه یې ''سوفېسټ سکالر'' په نامه بللې او وايي چې دا ډله ډېره مهاهره ده.

د امریکا ولسمشر جوبایډن د روسیې ولسمشر ویلایمیر پوتین سره په تېلېفوني خبرو کې هغه ته ویلي چې د هغو انټرنېټي مجرمانو پرضد اقدامات وکړي چې له روسیې نه د پېسو په خاطر په امریکا کې بریدونه کوي.

د سایبري امنیت 'هانټرېس لبز' شرکت وايي د امریکا متحدو ایالتونو کې د باج اخیستو لپاره پر شاوخوا ۲۰۰ کاروبارونو "ستر" سایبري برید شوی دی.

د امریکا او بریتانیا استخباراتي ادارو د روسیې اړوند پوځي هکران تورن کړي چې په دغو هېوادونو او نوره نړۍ کې یې د پارلمان د غړو په ګډون د سیاسي مشرانو د بریښنالیکونو او نورو مالوماتو د پټولو لپاره سایبري کمپاین روان کړی دی.

مایکروسافټ تکنالوژۍ شرکت اعلان کړی دی چې خپل یو تر ټولو مشهور او ډېر کارېدونکی پروګرام، انټرنټ اکسپلورر' به د راتلونکي ۲۰۲۲ کال له جون وروسته بندوي.

د امریکا پر حکومتي ادارو د ستر برید کشفوونکې کمپنۍ وايي، نږدې پنځوسو شرکتونو ته ډېر تاوان رسېدلی دی. د فایر ای کمپنۍ اجرايي مشر کوین مانډیا وايي، د ۱۸ زرو امریکايي سازمانونو برېښنايي سیستم ککړ شوی، خو پنځوسو شرکتونه تر ټولو ډېر زیانمن شوي دي. هېکرانو په دې برید کې پر نورو سربېره د امریکا مالیې، بهرنیو، دفاع او کورني امنیت وزارتونه هم په نښه کړي وو.

د امریکا د ولسمشر ډونلډ ټرمپ ادارې ددغه هېواد کانګرس ته ویلي، په روسیه کې د دوو پاتې کونسلګریو د بندولو په درشل کې ده. د امریکا د بهرنیو چارو وزارت ویلي، اوس د روسیې ختیځ ولادیوسټوک کې د کونسلګرۍ او یکاترینبوورګ کې د خپلو فعالیتونو د دایمي بندېدا په اړه غور کوي. ددغو دیپلوماتیکو مرکزونو د بندېدو خبر د درې ورځو مخکې سایبري بریدونو ته ورګرځي.

امریکايي چارواکي خبرداری ور کوي، د کمپیوټري سیستم د هک ستر عملیات چې دا اونۍ وموندل شول حکومت، مهمو بېخ بنسټونو او خصوصي څانګې ته سخت خطر متوجه کوي. د امریکا د سایبري امنیت او بېخ بنسټو تاسیساتو اداره یا سیسا وايي، دا ډول برید شنډول به "ډېر پېچلي" وي.