منځنی ختیځ

اسرائیلي چارواکو وروسته له هغه د لټون عملیات پیل کړي چې شپږ تنه فلسطیني زندانیان تېره شپه د اسرائیلو له تر ټولو خوندي زندانونو په تېښته بریالي شول.

د لبنان په شمال کې د تیلو د یو لیږدونکي ټانکر په چاودنه کې لږ تر لږه ۲۰ کسان وژل شوي دي.

د اسرائیلو د بهرنیو چارو وزیر په عرب سمندر کې د اسرائیلي شرکت پر یوه تېلي بېړۍ برید- چې لږ تر لږه دوه کسان پکې ووېل شول، پړه پر ایران اچولې ده او له نړۍ یې غوښتي چې د ایران پر وړاندې خپله چوپتیا ماته کړي. په ایران پورې د اړوند "العالَم" ټلویزوني شبکې د راپور له مخې په سوریه کې د "مقاومت" ځواکونو اعلان کړی چې د اسرائیلو په مدیریت پر یو نفت وړونکي د برید مسؤل دي.

د امریکا ولسمشر جو بایډن وايي، د روان میلادي کال تر پای له عراق د دغه هېواد جنګي ځواکونه وځي او پاتې ځواکونه به یې د عراقي پوځ روزلو او سلا مشورو ورکولو ته دوام ورکوي. د جو بایډن دا اعلان سپینه ماڼۍ کې د عراق له لومړي وزیر مصطفی کاظمي سره تر لیدنې وروسته دی. عراق کې دوه نیم زره امریکايي پوځ له ځايي ځواکونو سره د داعش د پاتې شونو په ځپلو کې مرسته کوي. د دواړو مشرانو لیدنه په عراق کې پر امریکايي ځواکونو ایران ته د نږدې وسلوالو د بریدونو د زیاتېدو اندېښې سره هممهاله ده.

اسرائیل حکومت وايي، د دغه هېواد توکمپالو هغه مارش یا لاریون راتلونکې اونۍ تر سره کېدای شي چې منتظمین یې د پولیسو تایید ته منتظر دي.

اسرائیلي پولیسو د منا الکرد په نامه هغه مخکښه فلسطینۍ فعاله او ورور یي له نیول کيدو وروسته خوشي کړل چې له ختیځ بیت المقدس نه د فلسطینیانو د ایستل کېدو پر ضد احتجاجونه او مبارزه کوي.

داسې ښکاري چې نفتالي بېنېټ به د اسرائیلو نوی لومړی وزیر شي. ښاغلی بېنېټ چې د کومانډو ځواکونو مخکینی غړی او د تکنالوژۍ صنعت کې یې میلیونونه ډالر ګټلي وايي، د بنیامن نتنیاهو پرتله ډېر ښي اړخو ته نژدې دی او د فلسطیني دولت له تصور سره مخالف دی.

د اسرايئلو لومړي وزير بنيامين نتنياهو سياسي مخالفانو موافقه کړې چې په اسرائيل کې د ايتلافي حکومت په جوړولو سره د لومړي وزير په توګه د نوموړي واکمني پای ته ورسوي. د ښي اړخي ملتپال ګوند مشر نفتلي بېنېټ اعلان کړی چې د يائر لپيډ له ايتلافي دولت سره يو ځای کېږي. ښاغلی لپيډ تر چارشنبې وخت لري چې کابينه بشپړه کړي. ښاغلی نتنياهو د ۱۲ کلونو اوږدې مودې لپاره د اسرائيل د لومړي وزير په توګه پاتې شوی.

د امریکا بهرنیو چارو وزیر انتوني بلېنکن وايي، د اسرائیل او فلسطینیانو تر منځ د اوربند پیاوړتیا هڅو لړ کې به امریکا د غزه بیا رغاونه کې مرسته وکړي. ښاغلي بلېنکن له اسرائیلي لومړي وزیر بنیامن نتنیاهو سره له لیدنې وروسته وویل، ''له جدي بشري حالت سره مبارزه ځکه اړینه ده، چې د تاوتریخوالي بیا رامنځته کېدو مخه ونیول شي. ټاکل شوې د امریکا بهرنیو چارو وزیر به پر سې شنبه د فلسطیني ادارې له ولسمشر محمود عباس سره د لیدو لپاره رمله ته سفر وکړي.