برېښنايي وسايل

د افغانستان د دایکندي مرستیال والي محمد علي روزګاني خواله رسنیو کې دا رپوټونه ردوي چې دغه ولایت کې سوختوک برېښنا بند د درز له امله له نړېدو سره مخ دی. سوختوک برېښنا بند د روانې اپرېل میاشتې پر اتمه ګټې ته وسپارل شو، خو لا یې رسمي پرانیسته نه ده شوې. خو له څو ورځو راهیسې خواله رسنیو کې دا خبره لاس په لاس کېږي چې سوختوک بند کې له رسمي پرانیستې مخکې درز پیدا شوی او د نړېدو له ګواښ سره مخ دی.

تاجکستان کې د اوبو کمېدو سره افغانستان ته د دغه هېواد صادراتي برېښنا هم کمه شوې ده. د تاجک برېښنا شرکت ویاند ناظر یادګاري وايي، تاجکستان پر ۲۰۱۹ کال یو میلیارد او ۴۵۸ میلیون کیلوواټ ګړۍ برېښنا افغانستان ته صادره کړې، خو پر ۲۰۲۰ کال یې ۹۲۵ میلیون کیلوواټ برېښنا دغه هېواد ته ور کړې.

د افغانستان او ترکمنستان ترمنځ د اورګاډي پټلۍ (۳۰ کیلومتره)، نوري فایبر (۲۵۰۰ مېګا بایټه انټرنېټ) او برېښنا (۵۰۰ کیلو واټه برېښنا له اقینې تر شبرغان) درې پروژې پرانیستل شوې، چې ولسمشر محمد اشرف غني یې د سیمې له هېوادونو سره د افغانستان د نښلولو لپاره مهم بولي.

د افغانستان برېښنا شرکت وايي، دغه هېواد ته د ازبکستان وارداتي برېښنا د تخنیکي ستونزو له امله پرې شوې. د دې تخنیکي ستونزې له امله د برېښنا په پرې کېدو سره کابل او اوه نور ښارونه تیاره شول. د ازبکستان وارداتي برېښنا د افغان ښارونو د روښانولو یوه اصلي سرچینه ده. افغانستان عادي حالت کې له ازبکستان ۴۵۰ میګا واټ برېښنا واردوي، خو وروستیو میاشتو کې تاشکند د خپلې کورنۍ اړتیا له مخې دا برېښنا ۱۵۰ میګاواټ کمه کړې ده.

د افغانستان برېښنا شرکت وايي له ازبکستان سره د برېښنا د یوه نوي تړون له مخې به له دغه هېواده په راتلونکو لسو کلونو کې په ثابته بیه برېښنا اخلي. دغه شرکت وايي، د راتلونکو لسو کلونو لپاره یې له ازبکستان یو کیلوواټ برېښنا په ۵ سنټه رانیولې ده چې څلور افغانۍ کېږي.

د افغانستان د احصايې او معلوماتو ملي ادارې اعلان کړی چې د تذکرو د تأیید لپاره یو مرکز پرانېستل شو څو د تذکرو (پېژندپاڼو) د تأیید پروسه چټکه شي.افغان دولت تذکره لرونکي اړ باسي، څو د پاسپورټ اخېستلو پرمهال خپلې تذکرې تأیید کړي.