پاکستاني قاضي پيغمبر ته په سپکاوي د تورنې اسيې د اپيل له اورېدو انکار کړی

Image caption اسیه بي بي لومړنۍ عيسوۍ مېرمن ده چې د اسلام پيغمر حضرت محمد (ص) ته د سپکاوي په تور سزا شوې.

د پاکستان په پلازمېنه اسلام اباد کې د دغه هېواد د ستري محکمې یوه قاضي د هغې عیسوۍ مېرمنې د بيا غور غوښتنې پر دوسيې له اورېدلو انکار کړی، چې د اسلام پيغمبر ته د سپکاوي په تور د مرګ په سزا محکومه ده.

د سترې محکمې دغه قاضي چې اقبال حمید الرحمان نومېږي، پنجشنبې (۱۳ اکټوبر) يې د اسیه بي بي د دوسیې له اورېدلو انکار وکړ.

کله چې د اسیه بي بي د مرګ د سزا ضد د دوسیې اورېدنه پيل شوه، نو د قاضيانو د ډلګۍ مشر میا ثاقب نثار د قاضي اقبال حمید الرحمان خوا ته په اشاره او د هغه په خوښه وویل، دا چې دی د اسلام اباد د لوړې محکمې د مشر قاضي په توګه د پنجاب د پخواني وژل شوي والي سلمان تاثیر دوسیه اورېدلې، او همدا دوسیه له هغې سره څه ناڅه تړلې ده، نو دی دغه دوسيه نه شي اورېدلی.

سعودي "اسلام ته په سپکاوي" یو فعال ۱۰۰۰ دُرې وهي

پاکستان د یوه خبریال له هېواده بهر ته پر تګ "بندیز لګولی"

د محکمې په خبره د دغې دوسیې د بیا اورېدنې دا غوښتنه به بېرته قاضي القضات ته ولېږي، چې هغه به يې بیا د اورېدنې په تړاو امر وکړي.

اسیه بي بي لومړنۍ عيسوۍ مېرمن ده چې د اسلام پيغمر حضرت محمد (ص) ته د سپکاوي په تور سزا شوې.

د دغې مېرمنې پر ضد په ۲۰۰۹ کال کې د اسلام پيغمبر ته د سپکاوي په تور رپوټ ثبت شوی و او پرې تور پورې کېده، چې د پنجاب په شېخوپوره ولسوالۍ کې يې په کرونده کې د کار کولو مهال له مسلمانو ښځو سره په بحث کې د حضرت محمد په ضد خبرې کړې وې.

تر دې یو کال وروسته په ۲۰۱۰ عیسوي کال کې اسیه بي بي ته د پنجاب ایالت لوړې محکمې د مرګ سزا واورله.

په اسلام اباد کې د سترې محکمې د قاضي لخوا د دغې دوسیې له اورېدلو تر انکار وروسته د اسیه بي بي مېړه عاشق له بي بي سي سره په خبرو کې وویل، دی "هیله من و، چې په دغه اورېدنه کې به د هغه د مېرمنې د مرګ سزا ختمه کړل شي او دوی ته به انصاف ورکړل شي."

د انځور حقوق Getty Images
Image caption دغې عیسوۍ مېرمنې ته د پاکستان د محکمې لخوا د مرګ تر سزا اورولو وروسته د بشري حقونو نړیوالو سازمانو بیا بیا د پاکستان له واکمنو غوښنتي

د دغې اورېدنې په وخت اسلام اباد کې د سترې محکمې مخې ته د بلوا د مخنیوي لپاره ګڼ پولیس سرتېري ځای پر ځای شوي وو، ځکه چې د اسيه بي بي په حق کې د سترې محکمې له ممکنه پرېکړې سره سم مذهبي محافظه کاران په بلوا لاس پورې کولی شي.

د سترې محکمې په دغه خونه کې چې په کې د همدغې دوسیې اورېدنه کېده، د اسلام اباد د سره جومات یو شمېر کسان موجود وو، یاد جومات په اسلام اباد کې د توند لارو ځاله بلل کېږي، چې پر ضد يې د پاکستان پوځ د پخواني امر جنرال مشرف په واکمنۍ کې عمليات کړي وو او تر هغه را وروسته دغه جومات ډېری وخت د مذهبي محافظه کارو او سخت دریزو مېشت ځای یادېږي.

اسیه بي بي په خپل اپيل کې ويلي، د پنجاب لوړې محکمې د هغې د دوسيې څېړلو مهال یوه اړخیزه پرېکړه وکړه او له کوم ډاډه ثبوت پرته يې هغه د مرګ په سزا محکومه کړه.

پاکستان کې روسي ځواکونه

نوموړې په دغه بیان کې زیاتوي، چې د هغه کلي ملا پر دې د اسلام قبلولو لپاره فشار واچاوه او کله چې دې ترې انکار وکړ نو پر ضد دعوا ثبت شوه.

یادې عیسوۍ مېرمنې ته د پاکستان د محکمې لخوا د مرګ تر سزا اورولو وروسته د بشري حقونو نړیوالو سازمانو بیا بیا د پاکستان له واکمنو غوښنتي، چې د هغې سزا دې ختم کړل شي، ځکه د دوی په اند چې ډېری مهال له دغه قانونه د لږکیو د ځپلو لپاره ناوړه ګټه اخیستل کېږي.

ورته مطالب