په موصل کې داعش د حکومتي ځواکونو په ضد سخت مقاومت کوي

د انځور حقوق Reuters
Image caption موصل له دوو کلونو راهیسې د اسلامي دولت په لاس کې دی

د عراق په موصل کې حکومتي ځواکونه د عملیاتو په شپږمه ورځ د اسلامي دولت ډلې یا داعش د وسلوالو له سخت مقاومت سره مخ دي.

له دې مخکې امریکايي چارواکو ویل، چې حکومتي ځواکونو په موصل کې پاموړ پرمختګ کړی دی.

د بي بي سي خبریال چې د موصل په جنوب کې د عراق له ځواکونو سره دی، وايي، داعش په ځانمرګو بریدونو سره د حکومتي سرتېرو مقابله کوي.

د هغه په خبره، داعش موټربمونه په ډېره چټکتیا سره د حکومتي ځواکونو لیکو ته رسوي او چاودنې ور کوي.

په ځواب کې حکومتي ځواکونه د موټر ضد لارښود توغندي کاروي.

په کرکو کې د داغش بریدونه

له بلې خوا د عراق پر کرکوک ښار د اسلامي دولت ډلې په ډله ییزو او همغږو بریدونو کې ۱۹ کسان وژل شوي دي.چاروکي وايي، داعش پر حکومتي ودانیو په برید کې ۶ پولیس او د یوه برېښنا کوټ د رغونې په چارو بوخت ۱۳ کارګر هم وژلي دي.

حکومت د اسلامي دولت د مقابلې لپاره دغه ښار ته نور سرتیري استولي.

پر کرکوک د داعش له برید وروسته بېړنی وضعیت اعلان شوی او ګرځبندیز لګېدلی دی.

د رپوټونو له مخې په دې جګړه کې د داغش ۱۲ وسلوال وژل شوي او جګړه لا هم روانه ده.

د انځور حقوق Getty Images
Image caption حکومتي ځواکونه د موصل په لور د حرکت په حال کې

د حکومت تېر اېستلو برید

حکومت او کورد ځواکونو په موصل کې تېره دوشنبه د اسلامي دولت په ضد پراخ عملیات پیل کړل.

موصل د کرکوک شمال لوېدیځ ته په ۱۷۰ کیلومترۍ ک پروت دی.

د عراق مرکزي حکومت او کوردان دواړه د د کرکوک پر ملکیت دعوه لري.

په عراق کې د بي بي سي خبریال ریچارډ ګلپین وایي، اسلامي دولت د دې لپاره پر کرکوک برید وکړ چې وښيي، لا هم یو ځواک دی. " د دې برید "څرګنده موخه له موصل د عراقي ځواکونو غړول دي."

د انځور حقوق Reuters
Image caption په کرکوک کې بېړنی وضعیت اعلان شوی او په تګ راتګ بندیز لګول شوی دی.

د ۱۸ مېرمنو وژل

د کرکوک په سویل کې په یوه بله پيښه کې اتلس میرمنې وژل شوې او څلویښت نورې ټپې شوې دي.

د چارواکو په وینا برید یوې نامعلومې جنګي الوتکې د شیعه ګانو پر یوې غونډه کړی چې د کربلا په پيښه کې یې د امام حسین پر وژل کیدو ویر کاوه.

امریکا له جمعې راهیسې په دغه سیمه کې د اسلامي دولت د وسلوالو په ضد هوايي عملیات پیل کړي دي.

له بلې خوا د امریکا دفاع وزیر اشټن کارټر وايي، له اسلامي دولت ډلې د موصل ښار د بیرته نیولو په عملیاتو کې د ترکیې د رول په اړه له ترکي چارواکو سره غږیدلی او هوکړې ته رسیدلی دی.

د نوموړي په خبره، د ناټو تړون د یوه غړي په توګه د موصل په بیرته نیولو کې د ترکیې د رول په اړه په اصولو کې د نظر توافق شته.

د انځور حقوق Reuters
Image caption حکومتي ځواکونه او کورد وسلوال په ګډه د داعش مقابله کوي.

له بلې خوا یوه عراقي چارواکي بي بي سي ته ویلي، عراق په دغو عملیاتو کې د ترکیې پر رول قانع دی، خو په داسې ډول چې د دغه هبواد خپلواکي له پوښتنې سره مخ نه کړي.

د موصل د بیرته نیولو د عملیاتو له پيل وړاندې د ترکیې ولسمشر رجب طیب اردوغان ویلي و، که د دوی رول ته پام ونه شي نو پر بدیله لار به فکر وکړي.

د موصل اکثره اوسیدونکي سني مذهب او یو شمیر یې ترکمن توکمه دي.

د ملګرو ملتونو د انساني حقونو ادارې په موصل کې د ملکي وګړو پر وضعیت اندیښنه ښودلې.

د دغې ا دارې ویاندې راوینا شمدساني ویلي، اسلامي دولت ډلې څه باندې پنځه سوه کورنۍ یرغمل کړي او ښايي د بشري ډال په توګه یې وکاروي.

" اسلامي دولت ډلې شاوخوا دوه سوه کورنۍ د اکتوبر پر اولسمه اړ کړې چې له سمالیا کلي موصل ښار ته کډه شي، په همدې ورځ یې۳۵۰ کورنیو له نجفیه کلي موصل ښار ته کډه کړې دي".

* داعش انسانان د ډال په توګه کاروي

د نوموړې په خبره، ملګري ملتونه هغه رپوټونه هم څیړي، چې وايي اسلامي دولت ډلې د موصل په څنډه کې په یوه کلي کې څلویښت ملکي وګړي وژلي دي،

موصل چې د عراق دویم لوی ښار دی دوه کاله وړاندې د اسلامي دولت لاس ته ولوید.

په عراق کې اوس موصل یواځینی لوی ښار دی، چې د دغې ډلې په ولکه کې دی.

ورته مطالب