گارډين: طالبان له مالي کړکېچ سره مخامخ دي

گارډين:

د انځور حقوق Getty Images
Image caption طالبان وايي، مشران یې د هلند د نشه يي توکو نه په ترلاسه کېدونکو پیسو هم اختلاف لري.

بريتانيا چاپ گارډين ورځپاڼې د طالبانو مالي وضعې ته کتنه کړې او وايي، دغه ډله اوس له مالي کړکېچ سره مخامخ ده.

د ورځپاڼې په وينا په دې تړاو د طالبانو غورځنگ له گڼو غړو سره خبرې شوي.

دغو کسانو ويلي د طالبانو مالي ملاتړي ځکه د پيسو ورکړې لپاره زړه نه ښه کوي چې د دغې ډلې د بريدونو ډېرى قربانيان اوس بهرني سرتيري نه بلکې ملکې وگړي دي.

په گارډين ورځپاڼه کې خپور شوى مطلب وايي، طالبانو د اوږد مهال لپاره په سيمه کې د افغان او عرب شتمنو سوداگرو په گډون له خپلو خواخوږو بسپنې را ټولولې.

د طالبانو د يوې سرچينې په وينا، د دوى مالي وړتيا اوس دومره کمزورې شوې چې د پاکستان شخصي کلينيکونه او روغتونونه يې د سختو ټپي غړو درملنه نه کوي، ځکه دوى يې د لگښت پرې کولو جوگه نه دي.

د طالبانو د واکمنۍ د مهال يوه لوړ پوړي ډيپلوماټ چې د ورځپاڼې په وينا اوس هم له طالب مشرتابه سره نژدې دى ويلي: "د جگړې مشروعيت له افغانستانه د ډېر شمېر بهرنيو ځواکونو د وتلو او د طالبانو خپلمنځيو شخړو له امله کمزورى شوى، هغه جگړه چې طالبان هڅه کوي د بهرنيو په وړاندې د مبارزې په توگه يې وځلوي".

ورځپاڼې د طالبانو د يوې بلې سرچينې له خولي ليکلي د طالب غورځنگ په لوړ پوړو چارواکو کې له هلمنده ترلاسه کېدونکو پيسو پر سر هم مخالفتونه راټوکېدلي دي.

په جگړييزو چارو کې د طالبانو اوسني مشر ملاهبت الله د تجربې کموالى هم د بسپنې په کچه کې کمښت لامل بلل شوى.

ټايمز اف انډيا:

د انځور حقوق Getty Images
Image caption افغانستان ته د نرېندر مودي په تېر سفر کې هم نوموړي درې الوتکې افغان لوري ته وسپارلې.

ټايمز اف انډيا په خپله نننۍ گڼه کې ليکلي چې هند له ژمنې سره سم افغانستان ته څلورمه الوتکه هم ورکړه.

ورځپاڼه وايي، هند د اسيا زړه هېوادونو غونډې په درشل کې له افغانستان سره خپلې همکارۍ ډېرې کړي، او دغه هېواد ته يې د شوې ژمنې پر بنسټ يو "ام اى ٢٤" ډوله چورلکه وسپارله.

هند افغانستان ته د څلورو "ام اى ٢٤" چورلکو د ورکړې ژمنه کړې وه چې درې هغه يې وارله مخه دغه هېواد ته د لومړي وزير نرېندرا مودي د سفر په ترڅ کې سپارل شوې وې.

د انځور حقوق Reuters
Image caption د افغانستان هوايي ځواکونه کم شمېر الوتکې لري.

ډان:

ډان ورځپاڼې په پاکستان کې د بم موندنې کلپي يا جعلي وسيلو کارېدنې ته کتنه کړې.

د ورځپاڼې په وينا د "اې ډي اي٦٥١" په نامه د بم موندنې الې چې پر صادراتو يې بنديز لگېدلى په بريتانيا کې د يوه خصوصي شرکت له لوري جوړېدې او په گڼو هېوادونو کې د امنيتي ځواکونو له لوري کارېدې.

خو د دغې الې کارول په گڼو هېوادونو کې وروسته له هغه منع شول چې په ٢٠١٠ م کال کې د بي بي سي په گډون د ځينو ادارو څېړنو څرگنده کړه چې بم او يا چاودېدونکي توکي نشي پېژندلى.

ډان ورځپاڼه وايي، خو پاکستان اوس هم د بم يا د چاودېدونکو توکو موندنې لپاره "خوجي" په نامه ورته وسيله کاروي، چې د دغه هېواد د سياستوالو او ولسي استازو غوسه يې راپارولې