ټرمپ 'سوداګري پرېږدي'، پر ولسمشرۍ تمرکز کوي

د انځور حقوق AFP
Image caption ټرمپ وايي، شخصي سوداګریزې چارې به یې د ولسمشرۍ له کارونو سره په ټکر کې نه وي

ټرمپ وايي، د ولسمشرۍ پر چارو د پام کولو له کبله به خپله 'ټوله سوداګري پرېږدي' او تر ممکنه حده به د ګټو د ټکر مخنیوی وکړي.

نوموړي ویلي، لازم حقوقي سندونه د تنظیمېدو په حال کې دي او په ټولیز ډول به له خپلو سوداګریزو چارو ځان وباسي.

دی وايي: "ولسمشرۍ ډېره مهمه دنده ده."

پر ټرمپ ګوتنیوونکي په دې اند دي چې ګني د ولسمشر په توګه به نوموړی ښايي د امریکا او له نورو هېوادونو سره د راشه درشه په سیاست کې سره وېشلی پاتې شي.

ډونلډ ټرمپ د چارشنبې په ورځ پر ټویټر لیکلي وو: "د دسمبر پر ۱۵ مه به نیویارک ښار کې له خپلو ماشومانو سره د یوه لوی خبري کنفرانس له لارې هغه حقیقت وڅېړم، چې خپله لویه سوداګري به په بشپړه توګه د ولسمشرۍ د چارو د سم سمبالښت لپاره پرېږدم او امریکا یوځل بیا یو لوی هېواد وګرځوم."

ډونلډ ټرمپ د امریکا هغه لومړنی ولسمشر دی چې هېڅ کوم لوړپوړې سیاسي یا پوځي مخینه نه لري او یوازې اقتصادي فعالیتونه یې درلودل.

ښاغلی ټرمب د ۱۹۷۰ لسیزې نیمايي کې د خپل پلار د شتمنۍ له کبله د ملکیتونو بازار ته ننوت او بیا یې خپل کار په نړیواله کچه وغځاوه.

د ټرمپ د ټاکنیزو سیالیو پرمهال د هغه پر کاروبار ډېرې نیوکې وشوې. داسې نیوکه هم وه چې ولې د خپلې مالیې په اړه څرګندونې نه کوي.

پر هغه منتقدینو به ویل چې شاید دا کار له مالیو د تېښتې له کبله کوي.

ورته مطالب