ټرمپ د امریکا دریځ ماتولو سره د تایوان مشرې سره خبرې وکړې

ښاغلي ټرمپ د جنورۍ میاشتې په ټاکنو کې د مېرمن تسای بریالیتوب مبارکي ورکړه

د عکس سرچینه، AP

د عکس تشریح،

ښاغلي ټرمپ د جنورۍ میاشتې په ټاکنو کې د مېرمن تسای بریالیتوب مبارکي ورکړه

د امریکا ټاکل شوي ولسمشر ډونلډ ټرمپ د تایوان پروړاندې له ۱۹۷۹ کال راوروسته د امریکا سیاست له پامه غورځولو سره د تایوان له ولسمشرې سره پر ټېلفون خبرې کړې دي.

امریکا په ۱۹۷۹ کال کې له تایوان سره اړیکې پرې کړې.

د ښاغلي ټرمپ د واک لېږد ډلې ویلي؛ دواړو مشرانو د امریکا او تایوان ترمنځ نژدیو "اقتصادي، سیاسي او امنیتي اړیکو" ته اشاره وکړه.

چین تایوان یو بېلتون غوښتونکی ایالت بولي. دغه هېواد د تایوان پر لور د سلګونو توغندیو مخه اړولې او ګواښ یې کړی چې د اړتیا په وخت کې به په زوره دا جزیره ونیسي.

پیکنګ تراوسه د ښاغلي ټرمپ او د تایوان د ولسمشرې ترمنځ پر ټلفوني خبرو کوم غبرګون نه دی ښوولی.

د ښاغلي ټرمپ ډلې همداراز ویلي؛ ټاکل شوي ولسمشر د تایوان د جنوري میاشتې په ټاکنو کې د تسای اینګ وون بریالیتوب مبارکي ورکړې ده.

د عکس سرچینه، EPA

د عکس تشریح،

د ميرمن تسای گوند په سنتي ډول له چین نه خپلواکۍ ته لېوالتیا لري

مېرمن تسای ۵۹ کلنه ده او په تایوان کې لومړنۍ ښځینه مشره ده چې د ډیموکراتیک مترقي ګوند (ډي پي پي) په رائس کې په پرېکنده توګه بریالۍ شوې ده.

ډي پي پي په سنتي ډول له چین نه خپلواکۍ ته لېوالتیا لري.

د امریکا پخواني ولسمشر جیمي کارتر په ۱۹۷۹ کال کې تایوان سره اړیکې پرې کړې او د "واحد چین" پر سیاست یې ټینګار کړی و چې د امریکا رسمي سیاست شو.

سره له دې امریکا له تایوان سره غیر رسمي دوستان اړیکې لري.

د مېرمن تسای دولت د "واحد چین" سیاست نه مني؛ ددغه سیاست له مخې تایوان د چین برخه ده.

ورته وخت کې د سپینې ماڼۍ د ملي امنیت شورا ویاند نډ پرایس ویلي؛ له مېرمن تسای سره د ښاغلي ټرمپ خبرې د امریکا پخواني سیاست کې د بدلون په معنا نه دی.

هغه د جمعې په ورځ وویل؛ "موږ په کلکه د واحد چین سیاست ته ژمن یو. زموږ بنیادي ګټې د تایوان تنګي دواړو لوریو سره په سوله ییزو او ټیکاو لرونکو اړیکو کې نغښتی دی."

بلخوا راپور ورکړل شوی چې ښاغلي ټرمپ په ټېلفوني خبرو کې د فلیپین ولسمشر رودریګو دوترته ته بلنه ورکړې چې راتلونکی کال واشنګټن ته سفر وکړي.

دا خبره د ښاغلي دوترته سلاکارانو کړې خو په هغه وینا پاڼه کې چې د ښاغلي ټرمپ د واک لېږدولو ډلې خپره کړې دغې بلنې ته کومه اشاره نه ده شوې.

د فلیپین مشر د امریکا له ولسمشر بارک اوباما سره اختلاف لري او هغه ته یې سپکاوی کړی دی.

ښاغلي اوباما په سپتمبر میاشت کې له هغه سره کتنه لغوه کړې وه.