امریکا پر سعودي عربستان د وسلو پلورل محدودوي

د انځور حقوق Reuters
Image caption سعودي عربستان د یمن د رسمي حکومت په ملاتړ په یمن کې عملیات پیل کړل.

د امریکا حکومت وايي، په یمن کې د هوایي بریدونو له امله د ولسي مرګ ژوبلې د اندېښنو په دلیل پر سعودي عربستان د وسلو پلورل محدودوي.

په پنټګان(دفاع وزارت) کې یو چارواکي ویلي، په ډېره ځیرتیا کنټرولېدونکې وسلې به نورې عربستان ته ور نه کړي.

د بارک اوباما په مشرۍ د امریکا حکومت ویلي، په یمن کې د هوايي بریدونو د نښې ستونزو ته "اندېښمن" دی.

په تېر اکټوبر کې د سعودي عربستان په مشرۍ د عرب ټلوالې په هوایي برید کې له ۱۴۰ ډېر کسان په یمن کې ووژل شول، چې د جنازې مراسمو کې یې ګډون کړی و.

له هغه لږ وروسته د سپینې ماڼۍ د امنیت شورا ویاند نډ پرایس سعودي عربستان ته خبرداری ور کړ چې له ریاض سره د واشنګټن امنیتي همکاري "سپین چک نه دی"

* "یمن کې ماشومان له لوږې مري"

* د یمن کړکېچ: څوک د چا لپاره جنګېږي؟

* د یمن جګړه کې د وسلو پر کمپنیو نیوکې

خو د ځینې وسلو د پلور پر محدودولو سربېره امریکا ویلي، چې د سعودي عربستان د سرحدي امنیت په برخه کې به ریاض ته استخباراتي معلومات برابروي.

د پنټګان ویاند دا هم وایي، چې د سعودي عربستان په مشرۍ هوایي عملیاتو کې برخوالو پیلوټانو ته به د ولسي وګړو د ممکنه مرګ ژوبلې د مخنیوي لپاره روزنه ور کړي.

تمه ده چې د واشنګټن او ریاض ترمنځ نور پوځي تړونونه اجرا شي، په هغو کې د داسې چورلکو تړون هم راځي چې ارزښت یې له درې میلیارد ډالرو ډېر دی.

د انځور حقوق Getty Images
Image caption د یمن په تعز کې حکومت پلوه ولسي لښکر

په ۲۰۱۴ کال په یمن کې ـ چې د سیمې یو خورا بې وزله هېواد دی ـ د جګړې له پیلېدلو راهیسې په زرګونو ولسي وګړي وژل شوي او درې میلیونه نور بې کوره شوي دي.

حوثیانو په هغه کال د عبدربه منصور هادي د حکومت په شړلو سره پلازمېنه صنعا ونیوله. د یمن د رسمي حکومت د هغه مهال ځینې وزیران عدن ته ستانه شول.

سعودي عربستان دا تور ردوي چې ګویا د یمن کورنۍ جګړه کې د ډېرې ولسي مرګ ژوبلې مسوول دی او وايي، چې د دا ډول تېروتنو د مخنیوي لپاره ډېره هڅه کوي.

سعودي عربستان د امریکا د وسلو تر ټولو لوی پېرونکی بلل کېږي.