له پوله ساتونکي سرتېري سره د لومړي نظر مینه

په دې وسیله کې د غږ اوريدل او ویډیو لیدنه شونې نه ده.
د عراقۍ کډوالې او د مقدونیا یو افسر ترمنځ مینه

د مارچ میاشتې پر هغه باراني ورځ چې بوبي دودیوسکي خپله مېرمن لومړی ځل ولیده له دندې رخصت و، خو د یوه بل همکار پر ځای دندې ته تللی و. ۳۵ کلن دودیوسکي د مقدونیا پوله ساتو ځواکونو یو سرتېری و.

پر هغه ورځ د زرګونو نورو کډوالو په منځ کې، چې غوښتل یې له پولې تېر شي، یوه ځوانه عراقۍ مېرمن ۲۰ کلنه نورا ارکوازي هم شامله وه، چې له خپلې کورنۍ سره د عراق دیالا سیمې کې له روانو جګړو تښتېدلي وه.

نورا له مور، پلار، خور او ورور سره د ترکیې او یونان لسبوس ټاپو له لارې د مقدونیا پولې ته رسېدلې وه.

دوی هغه مهال له پولې سره انتظار کاوه، چې ښايي پوله یې پر مخ پرانیستله شي، چې دودیوسکي ولیده. هغه وايي د نوموړې په سترګو کې یې څه خاص ولیدل، چې دی یې ( برخلیک ) بولی.

د دوی د لیدو پر مهال د بالکان هېوادونو د کډوالو پر مخ خپلې پولې تړلې وې. اغلې ارکوازي اي ایف پي خبري اژانس ته وویل:

''بس همدومره مې غوښتل، چې جرمني کې له خپلې کورنۍ سره ژوند وکړم. ''

د هغې شپږ ژبې زده دي او کله چې پولې ته ورسېده، د غوښتنې برعکس له دې کبله دودیوسکي سره مخامخ شوه، ځکه هغه په انګلیسي پوهیده. د بي بي سي نیوز ډې سره خبرو کې هغې وویل:

''په هغه ورځ مې سخته تبه وه او څو ځلې لوېدلې وم، خو کله چې دودیوسکي ولیدم سملاسي یې د درملنې لپاره د سره صلیب روغتیا پالانو ته واستولم. ''

د انځور حقوق AFP
Image caption د نورا کورنۍ جرمني ته ورسېده، خو دا له میړه سره مقدونیا کې پاتې شوه

اغلې ارکوازي وايي، دودیوسکي غوښتل هغه مهال د یوه مسلکي سرتېري په څېر چلن وکړي، خو یوې همکاره یې پر حالت پوه شوه او ورته یې کړل:

'' اه، فکر کوم په مینه کې ډوب شوې او همدلته پر پوله درنه چا زړه غلا کړ! ''

نوموړې زیاتوي:

'' له هغه وروسته ما ورسره خبرې وکړې او فکر کوم غوښتل مې خبرې مو اوږدې شي. ''

دودیوسکي بیا دا خبره په بل انداز کوي:

''ما ډېرې نجونې ولیدې، ښايي ځینې یې یو څه تر نورا ډېرې ښایسته هم وې، خو د نورا په سترګو کې مې څه خاص ولیدل او له ځانه سره مې ویل، بس هر څه چې کېږي، نورا باید همدلته زما د مېرمنې په توګه پاتې شي. ''

له ناروغۍ نه له ښه کېدو وروسته نورا له سره صلیب سره همکاري پیل کړه.

د تابانوک پنډغالي نژدې ټول کډوال د خپل برخلیک په اړه د خبرو اورېدو ته منتظر وو، خو نورا او دودیوسکي د یوه بل پېژندلو هڅه کوله.

دودیوسکي به نورا او د هغې مور د کالیو رانیولو لپاره نږدې بازار ته بیولې.

د اپریل میاشتې پر یوه ورځ چې دوی دواړو یوه رستورانت کې ډوډۍ خوړه، دودیوسکي ډېر وارخطا معلومیده، داسې چې څو ځلې یې اوبه وشړپولې او لاس یې رېږدېده.

ما ورته وویل، 'ته ټوکې کوې!، ' خو نژدې لس ځله تکرار کړه، 'ایا غواړې واده راسره وکړې؟ '

د انځور حقوق AFP
Image caption میړه یې عیسوي دی، خو مېرمن یې کردي مسلمانه ده

او بالاخره نورا ومنله، چې مېرمن دودیوسکي شي.

دغې جوړې داسې حال کې د مقدونیا شمالي ښار کومانووف کې واده وکړ، چې مېړه یې عیسوي او مېرمن یې کرد نژاده مسلمانه ده.

د دوی واده میلمستیا ته د نورا د سره صلیب ادارې همکارانو په ګډون نږدې ۱۲۰ میلمانه ورغلي وو.

کله چې له نورا دودیوسکي نه د دوی د واده لامل وپوښتل شو، هغې دا د لومړي نظر مینه وبلله.

د هغې کورنۍ جرمني ته په تلو بریالۍ شوه، خو نورا په مقدونیا کې له خپل مېړه او د هغه له دریو ماشومانو سره پاتې شوه.

د پنځو کسانو دغه کورنۍ په کومانووف کې ژوند کوي او ژر به د دغې کورنۍ غړي شپږ کسان شي. نورا په خندا وویل: څلور میاشتې کېږي، چې مېندواره یم