تري تم شوی پاکستانی مدني فعال کور ته ستون شو

د انځور حقوق FACEBOOK
Image caption .

د پاکستان پلازمېنه اسلام اباد کې ځايي پولیس وايي، مدني فعال او بلاګ لیکونکی سلمان حیدر، چې څو ورځې مخکې تري تم شوی و، بېرته کور ته ستون شوی دی.

د ښاغلي حیدر کورنۍ هم منلې، چې هغه کورته رسېدلی او وايي روغتیا یې ښه ده.

پاکستان: د مدني فعالانو او مذهبي ګوندونو اییتلاف شخړه

اسلام اباد: د بشري حقونو فعال پروفیسور لاهم تري تم دی

پاکستان: احتجاجیانو د تري تم شویو لیکوالو د موندنې غوښتنه کړې

سلمان حیدر د پوهنتون استاد دی، د بشري حقونو لپاره فعالیت کوي او پر ټولنیزو مسایلو د شاعرۍ له کبله یې شهرت موندلی. نوموړی د روانې میاشتې په شپږمه نېټه پلازمېنه اسلام اباد کې تري شوی و.

د هغه له ورکېدو وروسته د پاکستان لر او بر کې مظاهرې وشوې او له حکومته د هغه موندنې لپاره د اقداماتو غوښتنه وشوه.

د انځور حقوق TWITTER
Image caption د فاطمه جناح پوهنتون محصلینو د سلمان حیدر له تري تم کېدو وروسته مظاهره وکړه

د پاکستان کورنیو چارو وزیر چوهدري نثار علي خان پولیسو ته امر کړی و، چې د ښاغلي حیدر د موندلو لپاره لاس پر کار شي.

پولیسو ته د ورکړل شوې عریضې له مخې سلمان حیدر د جنورۍ پر شپږمه شپه د اسلام اباد بني ګاله سیمه کې له ملګرو سره و او مېرمنې ته یې ویلي و، چې د شپې تر اتو بجو به کورته ورسېږي، خو وروسته د نوموړي له ګرځنده ټیلیفونه د هغه کورنۍ ته لیکلی پیغام ورسېد، چې باید د هغه ګاډی له کورال نومي څلور لارې کورته ورسول شي.

سلمان حیدر په فاطمه جناح پوهنتون کې له استادۍ مخکې ډرامې لیکوالۍ، خبریالي او تیاتر برخه کې هم فعالیتونه کړي.

اړونده مطالب