فلیپين: ابوسیاف جهادي ډلې له یرغمل شوي جرمن سړي سر پرې کړی

.
د عکس تشریح،

دواړه کسان له دې مخکې سومالي تښتونکو یرغمل کړي وو

فلیپین کې سخت دریځو اورپکو یوه ویډیو خپره کړې، چې په کې د یرغمل شوي جرمن سړي وژل ښوول شوي.

جورګین کانتنر نومبر میاشت کې د مالیزیا په سبا ایالت کې له خپلې بادي کښتۍ تښتول شوی و.

د نوموړي ملګرې سابین میرز مړی وروسته په یوه کښتۍ کې وموندل شو.

اویا کلن کانتنر او اغلې میرز په ۲۰۰۸ کال کې سومالي سمندري غدۍ تښتولي وو او بیا یې ۵۲ ورځې وروسته د باج له اخیستو وروسته خوشي کړي وو.

اوس د نوموړي خوشي کېدو بدل کې د ۳۰ میلیونه پېسو یا ۴۸۳ زره ډالرو باج ورکړې لپاره ټاکل شوی ضرب الاجل نېټه یکشنبه ټاکل شوې وه.

په یوه ویډیو کې لیدل کېږي، چې نوموړی د یوه سړي لخوا په چاکو وژل کېږي. د حکومت استازي جیسوس دوریزا د نوموړي وژل کېدل تایید کړي دي.

هغه وايي:

''موږ تر وروستۍ شېبې پورې خپلې ټولې هڅې وکړې، خو و نه توانېدو هغه وژغورو. ''

که څه هم تر اوسه پورې د نوموړي مړی نه دی موندل شوی، خو فیلیپین پولیسو په وینا نوموړی په سویلي یولو ایالت کې د یکشنبې پر ورځ وژل شوی دی.

ابوسیاف چې یوه کوچنۍ ډله ده، خو د فلیپین په سویل کې له ټولو ډېره خونړۍ ډله بلل کېږي.

د عکس تشریح،

ابو سیاف ډلې له اسلامي دولت نومي ډلې سره وفاداري اعلان کړې

دغې ډلې له اسلامي دولت نومې ډلې سره د ملګرتیا ژمنه کړې او د بهرنیانو او فیلیپینیانو په تښتولو کې لاس لري.

له دغو تښتول شویو نه یو شمېر یې د پېسو بدل کې خوشي شوي دي، خو ځینې نور لا هم د دغې ډلې سره بندیوان دي.

د دغې وژنې له تایید کېدو وروسته سولو ایالت کې د فلیپین هوايي ځواک له لوري د ابو سیاف وسله والو پر مرکزونو د بمباریو رپوټونه ورکړل شوي دي.