سوريه کې لويې چاودنې ګڼ کسان وژلي دي

سوريه

د عکس سرچینه، AFP

د عکس تشریح،

دغه پېښه سوريه کې د ياغيانو تر ولکې لاندې سيمه راشيدين کې رامنځ ته شوې ده.

په سوريه کې د يوه ځانمرګي موټر بم په ترڅ کې لږ ترلږه ۴۵ تنه وژل شوي او ګڼ شمېر نور ټپيان دي. بم په موټر کې ځای پر ځای شوی و او ويل کېږي هدف يې له کلابندو سيمو د ولسي خلکو د لېږد د موټرو کاروان و.

په وژل شويو کې ماشومانو هم شامل دي، د چاودنې له امله پر بسونو او موټرو اور لګېدلی دی او پر سړک د وژل شویو او ټپيانو جسدونه پراته دي.

دغه پېښه سوريه کې د ياغيانو تر ولکې لاندې سيمه راشيدين کې رامنځ ته شوې ده.

سوريه کې د کورنۍ جګړې له امله په زرګونو خلک کلابند پاتې دي.

د سوريې د حکومت او مخالفو وسله والو تر منځ د "څلور سيمو" په اړه يو تړون لاسليک شوی و چې د جګړې له امله د زيانمن شويو خلکو سره مرسته وکړي.

د دغه تړون له مخې ۳۰ زره تنه د ياغيانو او حکومت تر ولکې لاندې سيمو څخه ايستل کېدل خو د اې اېف پي خبري اژانس په وينا اوس د حکومت تر ولکې لاندې سيمو کې ۵ زره او د ياغيانو تر ولکې لاندې سيمو ۲۲۰۰ تنه بند پاتې دي.

د عکس سرچینه، Reuters

د عکس تشریح،

سوريه کې د کورنۍ جګړې له امله په زرګونو خلک کلابند پاتې دي.

د راپورونه له مخې ځايي مهال ۳:۳۰ بجې د تلاشۍ د پوستې سره نژدې دغه چاودنه وشوه. د سوريې د حکومتي رسنيو په وينا تراوسه ۳۹ تنه وژل شوي خو د ځينو نورو خبري رسنيو او عينی شاهدانو په وينا په دغه پېښه کې له ۶۰ ډېر کسان وژل شوي دي.

تراوسه هېڅ کومې ډلې د دغه بريد مسوليت نه دی منلی.