امریکا: د کوردستان ټولپوښتنې پایلې نه منو

. د انځور حقوق Getty Images

امریکا د بهرنیو چارو وزیر ریکس ټېلرسن د یوې خبرپاڼې په خپرولو ویلي، هېواد یې د کوردستان د خپلواکۍ ټولپوښتنه په رسمیت نه پېژني.

هغه خبرپاڼه چې جمعه سپټمبر ۲۹ له بهرنیو چارو وزارت څخه خپره شوې، ټېلرسن پکې په ټینګار ویلي چې د کوردستان د خپلواکۍ ټولپوښتنه قانوني بڼه نه لري او د امریکا دریځ دا دی چې له یو موټي، فدرال او ډیموکراټ عراق څخه ملاتړ کوي:

" په ورته وخت کې موږ د دې یو اړخه کړنې بالقوه منفي پایلو ته اندېښمن یوو، موږ تر ټولپوښتنې وړاندې هڅه وکړه چې دواړه خواوې رغوونکی ګام واخلي؛ داسې رغوونکی ګام چې د کوردستان پکې خیر وي. دغسې ارمانونه یوازې په ټولپوښتنو نه شي پوره کېدای."

په خبرپاڼه کې د امریکا د بهرنیو چارو وزیر عراقي چارواکو ته د زغم او حوصلې سپارشتنه کړې او عراق ته یې هم د هر ډول زور او تاوتریخوالي په اړه خبرداری ور کړی دی.

په ورته وخت کې د جمعې په ورځ د کوردستان له هوايي ډګره نړیوال پروازونه لغوه شول.

دا کار د کوردستان د خپلواکۍ له ټولپوښتنې سره د عراق د دولت د جدي مخالفت څرګندونه کوي.

د انځور حقوق Reuters
Image caption د مدني ټولنو دغه فعلان سره را ټول شوي چې د عراق او کوردستان تر منځ سولې او نږدېوالي لپاره خپل غږ اوچت کړي

بغداد وايي، سر له جمعې ورځې به له اربیل او سلیمانیه هوايي ډګرونو یوازې کورنۍ الوتنې وشي او نړیوالې هغه به ترې هغه وخت پیل شي چې د کوردستان حکومت د هوايي ډګرونو کنټرول له یوې مخې عراقي چارواکو ته وسپاري.

له عراق څخه د کورواکي کوردستان د خپلواکۍ په ټولپوښتنه کې ۹۲ سلنه رایه ور کوونکو له عراق څخه د خپلواکۍ په پلوۍ رایې کارولي دي.

که څه هم د یادې ټولپوښتنې د پایلو منل الزامي نه دي، خو دمګړۍ یې په عراق او کوردستان کې کورنۍ او بهرنۍ ستونزې زېږولي دي.

په دې وسیله کې د غږ اوريدل او ویډیو لیدنه شونې نه ده.
د عراق کوردستان کې د خپلواکۍ ټولپوښتنه

ورته مطالب