سکاټلنډ افغان ژباړونکو ته د لوړو زدکړو په پار قانون بدلوي

سکاټلنډ د انځور حقوق Getty Images
Image caption د سکاټلنډ د حکومت ددغه ګام هرکلی د پارلمان نورو غړیو هم کړی دی.

د سکاټلنډ حکومت اعلان کړی خپل قانون به بدل کړي، چې دغه هېواد کې مېشت د برتانوي پوځ پخواني افغان ژباړونکي وکړی شي لوړې زدکړې وکړي.

تر دې وړاندې افغان ژباړونکي چې ډېرو یې پنځه کلنې ویزې درلودې لوړو زدکړو کې د اقتصادي مرستې نه مستحق کېدل، په داسې حال کې چې عراقي ژباړونکو سره مرسته کېدله.

د سکاټلنډ د لوړو زدکړو وزیرې شرلي انني سمروېل د افغان ژباړونکو له ستایلو وروسته چې د ماموریت په موده کې یې خپل ځانونه او کورنۍ په خطر کې اچولي، هوډ څرګند کړ چې دوی سره به لوړو زدکړو کې د مرستې شونتیا برابروي.

مېرمن سمروېل دا ناسم کار وباله چې افغان ژباړونکي له لوړو زدکړو بې برخې دي، په داسې حال کې چې د دې په وینا له نورو سره مرسته کېږي.

په سکاټلنډ کې د بشري حقونو فعال محمد اصف بي بي سي ته وویل، افغان ژباړونکي ځکه لوړو زدکړو کې د مرستې نه مستحق کېږي، چې دا مرستې د پنځه کلنې ویزې درلودونکو ته ورکول کېږي، په داسې حال کې چې عراقي ژباړونکو ته له لومړي سره دایمي ویزه ورکړل شوې ده.

د انځور حقوق M. ASIF
Image caption ښاغلی اصف وايي، د سکاټلنډ د پارلمان غړې سندرا وایټ د افغان ژباړونکو د زدکړې په کمپاین کې ډېره مرسته کړې.

ښاغلی اصف وایي، په لومړي سر کې ده د خپل بشري حقونو د بنسټ له لارې هڅه وکړه افغان ژباړونکو ته د مرستې شونتیا برابره کړي، چې وروسته د سکاټلنډ د پارلمان غړې سندرا وایټ په دې برخه کې د افغانانو له کمپاین سره مرسته وکړه.

د قانون د بدلولو له اعلان سره چې اغلې وایټ یې هر کلی وکړ ویې ویل "دغه خلک حاضر شول او زموږ له پوځ سره یې مرسته وکړه او موږ بیا دوی ته د زدکړې موقع ورنه کړه."

د سکاټلنډ د حکومت ددغه ګام هرکلی د پارلمان نورو غړیو هم کړی دی.

ښاغلی اصف هیله من دی چې له دې سره به ډېره هغه افغانان چې لوړې زدکړې یې په افغانستان کې نیمګړې پاتې وې، دلته یې بشپړې کړي.

د ده په وینا، د زدکړو اهمیت ته په کتو ډېر افغانان ژباړونکي غواړي له نوي بدلونه ښه ګټه پورته کړي او د تحصیلي کال له پیل څخه به پوهنتونونو کې شامل شي.

اړونده مطالب