۱۳ روسان د امریکا ټاکنو کې په مداخلې تورن شوي

د انځور حقوق Reuters

د امریکا تېرو ولسمشریزو ټاکنو کې د روسیې د احتمالي مداخلې اړوندو ارزونو کې ۱۳ روسان او درې روسي بنسټونه په دې هڅه تورن شوي،‌ چې ګني د محافظه کار نوماند په ګټه یې د عمومي افکارو اغېرمنولو ته کار کړی.‌

دا ۱۳ تورن هغه کسان دي چې امریکا ته تللي،‌ د امریکايي وګړو په څېر یې ځانونه ټینګ کړي چې په خواله رسنیو کې د هیلیري کلنټن پر وړاندې د ډونلډ ټرمپ په ګټه ټاکنو کې کار وکړي.

د امریکا ټاکنو کې د روسیې د مداخلې د ځانګړې څېړنډلې مشر رابرټ‌ مولر درې تورن کسان چې نومونه یې هم اخیستل شوي، د پټو خبرو په اورېدو او پنځه نور تورن په جعلي هویت لرلو تورن کړي.

د نوموړي په وینا،‌ ځینو تورنو امریکا کې له کمپیوټري سیستمونو پټ پاتې شوي او د خپل اصلي ځای یې روسیه ټاکلی دی.

د اېف بي ای پخوانی مشر د امریکا ټاکنو کې د روسیې لاسوهنه پلټي

ګوګل: روسي اعلانونه له امریکايي ټاکنو سره تړاو لري

دی وايي:‌ "تورنو ځانونه امریکایان ګڼلي او په جعلي هویت یې خواله رسنیو کې امریکایان پر ځان ورټول کړي."

د انځور حقوق AFP
Image caption رابرټ مولر د امریکا ولسمشریزو ټاکنو کې د روسیې د مداخلې اړوندې دوسیې څېړنمشر دی

د رپوټونو پربنسټ،‌ د روسانو دا هڅې دوه کاله وړاندې د امریکا د ۲۰۱۶ کال له ولسمشریزو ټاکنو وړاندې پیل شوې دي.

واشنګټن کې د بي بي سي خبریال انتوني زورکر وايي، دا رپوټ که څه هم د مخکېنیو ادعاوو چې د ټرمپ د ټاکنیز کمپاین او روسیې ترمنځ‌ د تړاو خبره نه کوي، خو په ورته وخت کې کولی شي د امریکا ټاکنو کې د روسیې د مداخلې په تړاو بحثونه لا پسې ګرم کړي.

زموږ خبریال وايي، که څه هم سپینه ماڼۍ په دې رپوټونو سره کولی شي یوڅه د ارامۍ ساه واخلي،‌ خو دغه رپوټ ویلي چې د امریکا ټاکنو کې نفوذ کول ښايي د جمهوریپالو د نوماند اړوند کسانو په "ناغوښتل شوې" مرستې ترسره شوی وي.

د امریکا ولسمشر ډونلډ‌ ټرمپ په وار وار د ۲۰۱۶ کال ولسمشریزو ټاکنو کې د روسیې د مداخلې مسله او واک ته د ټرمپ په رسېدو کې د مسکو د همکارۍ تور بې بنسټه بللی دی.‌

د امریکا امنیتي بنسټونه راتلونکو ټاکنو کې د روسیې د مداخلې په اړه اندېښنه لري. درې ورځې وړاندې،‌ د امریکا څارګرو ادارو په ګډه وویل،‌ ښايي روسیه د امریکا د کانګرس راتلونکو ټاکنو بیا د مداخلې هڅه وکړي.

د انځور حقوق Getty Images
Image caption د امریکا امنیتي بنسټونه راتلونکو ټاکنو کې د روسیې د نفوذ په اړه اندېښمن دي

د څېړنې پایلې

څېړنو ښودلې چې روسي وګړو:‌

  • د امریکايي وګړو په نوم بانکي ګڼونونه جوړ کړي او خلک یې غولولي
  • زرګونه ډالر یې هره میاشت د سیاسي اعلانونو په اخیستو لګولي
  • د خپل هویت پټ‌ ساتلو لپاره یې د امریکا له برېښنايي فضا ګټه اخیستې
  • امریکا کې یې سیاسي غونډې جوړې کړې او خلک یې وربللي.
  • سیاسي تبصرې یې د امریکایانو په نوم پر خواله رسنیو خپرې کړې
  • د هیلیري کلنټن پرضد یې معلومات خپاره کړي
  • د خپرېدو مقابل کې یې پیسې ترلاسه کړې
  • د امریکا پر خواله رسنیو یې د خپرولو مقابل کې پیسې ترلاسه کړې
  • د حساسو مسلو په تړاو یې د بحث لپاره پر خواله رسنیو،‌ په تېره بیا فیسبوک او انسټاګرام د بحث ډلې جوړې کړې
  • فعالیتونو یې یوه میاشت کې تر یو میلیون ډېر ډالر بودیجه لرله

ورته مطالب