په غزه کې ۳ لاریون کوونکي وژل شوي

غزه د انځور حقوق Reuters
Image caption د تېرې جمعې په لاریونونو کې ۱۶ فلسطینیان وژل شوي وو

په غزه تراړه کې روغتیایي چارواکي وایي، د اسرائیلي ځواکونو په ډزو کې ۳ فلسطینی لاریون کوونکي وژل شوي او شپاړس نور کسان ټپیان دي.

له سیمې رپوټونه وایي چې د جمعې پر ورځ ګڼ شمېر فلسطینیانو یو ځل بیا د اسرائیلو پولې ته نږدې لاریون وکړ.

اسرائیلي ځواکونه هم مني چې پر هغو خلکو یې ډزې کړي چې د دوی سرحدي ځواکونو پر لور یې حرکت کاوه.

د تېرې جمعې پر ورځ هم په همدې سیمه کې پراخ لاریونونه وشول.

هغه مهال د اسرائیلي ځواکونو په ډزو کې ۱۶ کسان وژل شوي وو او تر ۱۰۰۰ ډېر ټپیان وو.

ویل کېږي چې په پنځو نورو سیمو کې هم اسرائیلي ځواکونو د لاریون کوونکو پر ضد اوښلن غاز کارولی.

فلسطیني لاریونوال وایي، بې ځایه شويو کډوالو ته دې هغو سیمو ته د ور ستنېدو اجازه ورکړل شي چې اوس د اسرائیلو خاوره بلل کېږي.

خو د اسرائیلو د حکومت یوه ویاند پر حماس ډلې تور لګولی چې د غزې اوسېدونکي یې را پارولي چې پولې ته نږدې پر اسرائیلي وګړو بریدونه وکړي.

د حماس ډلې اعلان کړی چې په پرله پسې توګه د شپږو اوونیو لپاره به د فلسطینیانو پر خاوره د اسرائیلو د قبضې پر ضد لاریونونه کوي.

یادې ډلې د لاریونونو دې لړۍ ته "د بېرته ستنېدو لوی مارچ" نوم ورکړی دی.

حماس وایي، فلسطینیان خپلو هغو سیمو ته د ور ستنېدو حق لري چې د ۱۹۴۸ کال تر جګړې وروسته اسرائیلو پرې قبضه کړې وه.

خو د اسرائيلو حکومت دا دعوه ردوي، او تور لګوي چې ترهګر غواړي د لاریونوو په ترڅ کې د اسرائیلو خاورې ته ننوځي.

د اسرائیلو د دفاع وزیر خبرداری ورکړی چې که هر څوک د سرحدي پوستو پر لور حرکت وکړي، خپل ژوند به په خطر کې اچوي.

ورته مطالب