نتنیاهو: د ایران اتومي پروګرام زرګونه مخه پټ معلومات مو ترلاسه کړي

نتنياهو د انځور حقوق Reuters

د اسرائیلو لومړي وزیر بنیامین نتنیاهو په یوه تلوېزیوني وینا کې د ایران د اتومي پروګرام د زرګونه مخه پټو معلوماتو ترلاسه کولو ادعا کړې چې وايي د تهران څنډو کې د یوه محرمامه مرکز په اړه دي.

دی وايي، دغه اسناد په ۲۰۱۵ کال د اتومي هوکړې له لاسلیکېدا وروسته د تهران شوراباد کې د پټ اتومي مرکز په اړه دي.

د نوموړي په خبره، اسرائیلو په یولړ استخباراتي عملیاتو کې وکړای شو چې د ایران د پوځي اتومي پروګرام په اړه ۵۵ زره مخه او ۵۵ زره ډیجیټل استخباراتي معلومات په ۱۸۳ سي ډي ګانو کې ترلاسه کړي.

نوموړي ځینې هغه انځورونه وښودل چې وايي د ایران د اتومي پروګرام په اړه دي او ایران یې تورن کړ چې په تېرو کلونو کې یې نړیوالې ټولنې ته د اتومي پروګرام په اړه دروغ ویلي.

د ایران د بهرنیو چارو وزیر جواد ظریف یې په غبرګونکې ویلي، دا پخواني معلومات دي چې وړاندې د اتومي انرژۍ د نړیوال اژانس له خوا ارزول شوي او ښاغلی نتنیاهو یې یو دروغجن وباله.

ډونلډ ټرمپ وروستی ځل د ایران اتومي هوکړه لاسلیکوي

ټرمپ د ایران اتومي هوکړې له تاییدولو انکار کړی

ځواکمن هېوادونه له ایران سره د اتومي هوکړې پلوي دي

جرمي هم له اسرائیلو غوښتي چې دغه معلومات ژر یاد اژانس ته ورکړي.

نتنیاهو دا څرګندونې ددغه هېواد دفاع وزارت کې د اسرائیلو د امنیتي کابینې له ناستې وروسته کړې دي.

نوموړي پخپلو خبرو کې ایران تورن ړی چې څو کاله یې د اتومي وسلو د تولید په لړ کې د "اماد" په نوم پروګرام طرح پټه ساتلې ده.

په ۲۰۱۵ کال امریکا او پنځو نورو سترو هېوادونو له ایران سره هوکړه لاسلیک کړه چې خپلې اتومي هڅې به کموي.

د امریکا ولسمشر ډونلډ ټرمپ چې له ډېر وخت راهیسې ددغې هوکړې د لغو کولو په هڅه کې دی، ویلي، د نتنیاهو له خوا د وړاندې شوې شرحې شاهد دی او دغه دریځ‌ "نه شي زغملی".

دی وايي، د راتلونکې مې میاشتې تر ۱۲مې به یې هېواد د ایران اتومي هوکړه کې د پاتې کېدو په اړه خپل دریځ اعلان کړي.

اروپايي هېوادونو ویلي دوی پر دغې هوکړې ولاړ دي.

نتنیاهو کوم دلیل درلود؟‌

نوموړي چې تل ابیب کې د اسرائیلو دفاع وزارت کې په انګلیسي ژبه خبرې کولې،‌ وویل په تهران کې یې له یوې پټې زېرمې د اسرائیلي استخباراتو له خوا د موندل شویو اسنادو "یوه کاپي" ترلاسه کړې ده.

ده وویل، د اماد پروګرام اړوند ۵۵ زره مخه او ۵۵ زره فایلونه یې په ۱۸۳ سي ډي ګانو کې ترلاسه کړي.

نوموړي ادعا وکړه چې ددې پروژې هدف دا و چې پنځه اتوم‍ي سروکي تولید کړي چې تر لسو کیلوواټن پورې ټي این ټي سخت چاودېدونکي توکي لېږدولی شي.

ده وویل:‌ "دغه فایلونه ثابتوي چې ایران دروغ ویلي خپل هېڅ اتومي پروګرام نه لري."

د نوموړي په خبره،‌ هېواد یې ددغو اسنادو یوه کاپي امریکا ته چمتو کړې ده او بله به یې د اتومي انرژۍ نړیوال اژانس ته ورکړي.

ددواړو دولتونو ترمنځ ترینګلتیا او ظاهراً دښمني له ډېرې اوږدې مودې راهیسې روانه ده، خو کله چې د اسرائیلو ګاونډي سوریه کې ایران د خپل پوځي حضور ملا وتړله،‌ دا ترینګلتیا لا پسې ډېره شوه.

اسرائيل پر ایران تور لګوي چې د حزب الله ملېشو ته وسلې ورکوي او د فلسطیني مقاومت لپاره د وسلو قاچاق کې لاس لري.

ورته مطالب