نتنیاهو: ایران له سرې کرښې اوښتی

. د انځور حقوق EPA

د اسراییل لومړی وزیر بنیامین نتنیاهو وايي، د سوریې په خاوره کې پر ایراني هدفونو د دوی د ځواکونو بریدونه "سمه" چاره وه، ځکه د هغه په خبره ایران له سرې کرښې پښه اړولې ده.

ښاغلي نتنیاهو په یوه ویډيويي پیغام کې ویلي، اسراییلیانو " د سوریې په خاوره کې پر ایراني هدفونو پرېمانه ګوزارونه کړي دي."

هغه وویل هېواد یې له ایران سره په جګړه دی او په دې اړه د اسراییل سیاست څرګند دی : " موږ نه پرېږدو چې ایران په سوریه کې پوځي شتون تثبیت کړي. "

اسراییل مخکې ویلي وو، د دوی پر خاوره د ایران د راکټي بریدونو په غبرګون کې یې په سوریه کې کابو د ایران پر ټولو اړوندو ځایونو او هدفونو بریدونه کړي دي.

* اسراییلي او سوري ځواکونو پر یو بل 'بریدونه' کړي

* "پر اسراییل د ایران برید به د بشار اسد حکومت وپرځوي"

* روسیه: اسراییل د سوریې پر هوايي ډګر "توغندیز برید" کړی

اسراییل د ایران سپاه پاسداران او د دغه ځواک قومندان قاسم سلیماني تورن کړي چې د سوریې له خاورې یې کابو ۲۰ توغندې پر اشغال شوې جولان سیمه ور توغولي دي.

امریکا، برتانیا او بحرین د "دفاع له حق" څخه ملاتړ کړی دی، جرمني، روسیې او فرانسې بیا له دواړو خواوو د نه جګړې غوښتنه کړې ده.

د دواړو لوریو ترمنځ نښتې له ایران سره له شوي اټومي تړونه د امریکا له وتلو دوه ورځې وروسته شوې دي.

اسراییل له ایران سره له شوي اټومي تړونه د امریکا پر شا کېدل ستایلي دي.

د امریکا ولسمشر ډونلډ ټرمپ له تړونه د وتلو پر مهال خبرو کې د ایران د اټومي پروګرام په اړه د اسراییل اندېښنو او افشاګریو ته نغوته (اشاره) وکړه.

د اسراییلي پوځ ویاند ویلي، د سوریې په خاوره کې یې د ایران لسګونه مرکزونه له منځه وړي دي.

نوموړې ادعا کړې چې پر اسراییلي جنګي الوتکو پسې د سوري ځواکونو څو توغول شوي توغندي یې هم شنډ کړي دي.

ویل کېږي د سوریې پر خاوره د اسراییل وروستي بریدونه له ۲۰۱۱ کال راهیسې چې په سوریه کې د بشار اسد دولت پر ضد پاڅونونه پیل شوي، تر ټولو درانده بریدونه دي.

ورته مطالب