چین له لانجمنو ټاپوګانو د امریکا بېړیو ته د وتلو خبرداری ور کړ

د انځور حقوق Getty Images

چین وايي، امریکا د دغه هېواد لانجمنو ټاپوګانو ته نږدې د دوو بېړیو په لېږلو سره د بېجینګ د ځمکنۍ بشپړتیا سخته خلاف ورزي وکړه.

د چین دفاع وزارت وايي، په دغه سمندرګي کې یې بېړیو او الوتکو د امریکا بېړیو ته له سیمې د وتلو خبرداری ور کړ.

امریکايي بېړۍ د دغه سمندرګي څلورو سیمو کې ګرځېدلې چې په هغو کې ووډي ټاپو هم دی، چې پکې چین توغندي لګولي دي.

* چين د نويو ټاپوګانو جوړولو په لټه

* د چین الوتکو په چین سمندرګي کې د امریکايي الوتکو مخنیوی وکړ

د مصنوعي سپوږمکۍ انځورونو وښودله چې دغه ټاپو کې پر لاریو توغندي لګول شوي دي.

له دې معلوماتو وروسته امریکا چین ته له هوايي سره نږدې سمندري مانورو کې د ګډون بلنه بېرته واخیسته.

د امریکا ځواب

ر د انځور حقوق Google/Digital Globe
Image caption ووډي ټاپو کې د چین توغندي او الوتکې

ارام سمندر کې د امریکا بېړۍ له خوا خپاره شوي بیان کې راغلي چې دې سیمه کې د ازاد ګرځېدلو اړوند دودیز پوځي تمرین کوي او راتلونکې کې به هم دا کار وکړي.

نږدې دوه اونۍ مخکې هم د چین هوايي ځواک وویل، چې بم غورځوونکو الوتکو یې اول ځل سوېلي چین سمندرګي ته استولې.

د بېجینګ دا ګام د امریکا لپاره نوی خبرداری دی.

لرې نښه ویشتونکو الوتکو کې (H-6K) کې هم دي چې په دغو ټاپوګانو کې یې مانورې وکړې او په دې سره یې ټولو سیمو ته د چین د لاسرسي وړتیا بهتره کړه.

چین له دې مخکې هم جنجالي ټاپوګانو ته نږدې د امریکا بېړیو پر تګ سخت غبرګون ښودلی او دا کار یې سخته سیاسي او پوځي نیواکګري بللې ده.

سوېلي چین سمندرګی

د انځور حقوق Reuters
Image caption چین په دغه سمندرګي کې مصنوعي ټاپوګان هم جوړ کړي دي.

سوېلي چین سمندرګی مهمه سوداګریزه لار ده، خو پر ملکیت یې شپږ هېوادونه دعوه لري.

چین ټول سوېلي چین سمندرګی د ځان بولي ،خو د دغه سمندرګي پر شاړو( له خلکو پر تشو) پارسل او سپارټلي ټاپوګانو ویتنام، فلیپین، تایونان او مالیزیا هم دعوه لري.

چین وايي، د خپل حق د دعوې د ثبوت لپاره ښه دا ده چې پېړیو مخکې اسنادو ته وکتل شي.

دغه هېواد د دې ادعا د ثبوت لپاره د ۱۹۴۷ کال یوه نقشه هم وړاندې کوي.

سوېلي چین سمندرګی د کبانو بډایه ډنډونه لري او داسې تصور کېږي چې د ګاز او تېلو خورا لویې زېرمې هم لري.

ورته مطالب