"اسلام اباد او کابل د افغان جگړې ختمولو په تړاو گډ دريځ ته رسېدو کې پام وړ پرمختگ کړى"

اکسرېس ټرېبيون:

د انځور حقوق افغان سفارت
Image caption افغان پلاوی اسلام اباد کې

پاکستانۍ اکسپرېس ټريبيون ورځپاڼې دغه هېواد ته د لوړپوړي افغان پلاوي د وروستي سفر په اړه ليکلي چې دواړو هېوادونو افغانستان کې د جگړې ختمولو په تړاو يوه گډ دريځ ته په رسېدو کې د پام وړ پرمختگ کړى.

ورځپاڼې د پاکستاني چارواکو په وينا ليکلي چې ډېر پر مختگ په ځانگړې توگه د جگړې د نه پخلا کېدونکو عناصرو يا هغو عناصرو د پېژندنې په برخه کې شوى چې سوله نه غواړي.

ورځپاڼه وايي افغانستان او پاکستان ډېرو کلونو لپاره د ترينگلو اړيکو له پړاوه تېرېدل او دليل په افغانستان کې د جگړې ختمولو په تړاو توپيرونه وو.

په وروستيو مياشتو کې دا حالت وروسته له هغه بدل شو چې دواړه غاړې د شکايتونو د ارزونې پر يوه نوي ميکانيزم سره سلا شول.

ورځپاڼه پرونۍ غونډې ته په اشاره وايي دواړو غاړو په يوه ژبه او ورته ټکو خبرې کولې.

ورځپاڼه وايي خو اصلي ننگونه د دغه حالت ساتل دي او دا د دوى پر ټينگ هوډ تړلې ده چې افغانستان کې د جگړې ختمولو په لور پر مختگ وشي.

نيويارک ټايمز

دغي ورځپاڼې"وچکالي په سخته جگړه کې د راگېر افغانستان کړاوونه ډېر کړي دي" تر سرليک لاندې يو مطلب خپورکړى.

ورځپاڼه د ملگرو ملتونو هغې وينا ته اشاره کوي چې ويلي یې دي د افغانستان دوه دريمه برخه له وچکالي سره مخ ده او شونې ده چې دوه ميليون خلک له سختۍ قحطۍ سره مخامخ شي.

ورځپاڼه وايي زرگونه کسان د وچکالۍ له امله له خپلو مينو بې ځايه شوي دي.

ورځپاڼې افغانستان کې د ملگرو ملتونو د بشري چارو همغګر (همغاړې کوونکي توبي لنزر څرگندونې راخيستي چې بسپڼه ورکوونکو ته وايي "همدا اوس گام واخلئ او د ناورين مخه ډب کړئ، او يا به راتلونکو شپږو مياشتو کې ډېر لگښت پرې کوئ." نوموړي ويلي افغانستان کې د وچکالۍ د زيانونو خطر ډېر لوړ دى.

انډېپنډنټ:

بريتانيايۍ انډېپنډنټ ورځپاڼه وايي د دغه هېواد د کورنيو چارو وزارت د محکمې د حکم سره سره ناقانونه پناه غوښتونکي په مياشتو مياشتو توقيفځيو کې ساتلي دي.

خو د کورنيو چارو وزارت ويلي په توقيفځيو کې د دغو کډوالو ساتل او يا ورته بېړني مېشتځي برابرول يوه خبره ده.

د کورنيو چارو وزارت ويلي که دوى پرېښوول شي چې په خپله خوښه نورو ځايونو ته ورشي نو له بې وزلۍ سره يې د مخامخېدو خطر شته.

ورځپاڼه وايي دا په داسې حال کې ده چې د هغو ادعاو له امله چې گواکې حکومت له ځوانو کډوالو تر لسو زرو پونډو پورې د هغوى د پناه غوښتني د قضايي بهير لگښت اخلي له سخت څار سره مخامخ دى.