ټرمپ له سعودي د تېلو د تولید ډېرول وغوښتل

ټرمپ د انځور حقوق AFP/GETTY IMAGES
Image caption ولسمشر ټرمپ ليکلي چې پاچا سلمان يې د تېلو د تولید د کچې د زیاتولو په اړه مطرح شوې غوښتنه منلې.

د امریکا ولسمشر ډونلډ ټرمپ له سعودي عربستان څخه غوښتي چې د تېلو د بيو د راټیټولو لپاره د تېلو د توليد کچه پوره لوړه کړي.

ښاغلي ټرمپ په یوه ټویټ کې د سعودي عربستان له پاچا ملک سلمان څخه غوښتي چې د ورځې د دوه ميليونه بېرله په اندازه د تېلو د توليد کچه لوړه کړي.

ولسمشر ټرمپ ليکلي چې پاچا سلمان يې دا غوښتنه منلې.

ښاغلي ټرمپ ليکلي، دغه اقدام ته "په ایران او وینزویلا کې د نارامۍ او اړودوړ له امله اړتيا ده".

د تېلو بيې تېره اونۍ لوړې شوې، چې یو لامل يې هم د تېلو پر ستر توليدوونکي ایران د نوو بندیزونو لګولو ته د امریکا تکل ښودل کېږي.

د تېلو د توليدوونکو هېوادونو ډلې یا 'اوپېک' د توليد له زیاتوالي سره هوکړه کړې او روسيې ورته ګام هم اوچت کړی، خو له دې سره سره بازارونه لا هم نه دي آرام شوي.

د سعودي خبري آژانس هم تأييد کړې چې ولسمشر ټرمپ او پاچا سلمان پر ټیلیفون غږېدلي، خو له ډېرو جزیياتو پرته يې ویلي چې دواړو لورو د تېلو د بازارونو د آرامۍ په ساتنه هوکړه کړې. خو په مشخص ډول يې نه دي ویلي چې سعودي عربستان په ورځ کې د دوه مېلیونه بېرله توليد د زياتولو وړانديز منلی دی.

"امریکا به په تاريخ کې تر ټولو کلک بنديزونه پر ايران ولګوي"

ټرمپ سعودي عربستان کې د میلیاردونو ډالرو هوکړې کړې

ټرمپ امریکا د ايران له اتومي تړونه وايسته

سعودي عربستان په نړۍ کې د تېلو تر ټولو ستر صادروونکی هېواد دی چې په تېره مې مياشت کې يې په ورځ کې شاوخوا لس میلیونه بېرله تېل توليدول.

د راپورونو له مخې، لا هم په ورځ کې له یونیم تر دوه ميلیونه بېرله پورې د نورو تېلو د توليد وړتيا هم لري، خو کارپوهانو وال سټريټ ژورنال ته ويلي، ښايي سعودي د ولسمشر ټرمپ د دې غوښتنې منلو ته لېواله نه وي.

يوه سعودي چارواکي یادې خپرنۍ ته ویلي چې "سعودي عربستان په ورځ کې له ۱۱ میلیونه بېرله ډېر توليد ته لېواله نه دی او د توليد د اوسنۍ کچې د ډېرولو هوډ هم نه لري. ځکه دا ګران پرېوځي".

ښاغلي ټرمپ له دې وړاندې بيا بيا پر اوپېک او د دغو هېوادونو په مطرح هغه، سعودي عربستان هم کلکې نيوکې کړې. د اپرېل په شلمه هغه په یوه ټویټ کې ليکلي و چې د تېلو بیه "په مصنوعي ډول لوړه شوې" او هغه يې "بده" او " د نه منلو" بللې وه.

د اوپېک بل غړي هېواد، ایران هم پر ښاغلي ټرمپ نيوکه کړې چې د دغې ډلې سياسي کول غواړي او په ریاض يې هم تور لګولی و چې غواړي د ټرامپ ورته خبرې واوري.

د ایران مذهبي مشر آیت الله علي خامنه‌يي د شنبې په ورځ پر خپله پاڼه ليکلي چې امريکا هڅه کوي د اقتصادي فشار له لارې ایراني ملت له نظامه جلا کړي چې له هغه وړاندې د امریکا شپږو نورو ولسمشرانو هم دا هڅه کړې خو پاتې راغلي.

د ایران پیسه، ريال هم په مې کې د ایران د اتومي پروګرام پر سر تړون ته د واشنګټن له شا کولو وروسته د پخوا پر تله ډېر راغورځېدلی.

د روانې اونۍ په سر کې زرګونو سوداګرو د تهران په ستر بازار کې لاريون وکړ او د ريال د ارزښت پر غورځېدو او د بيو پر لوړېدو یې اعتراض وکړ. دا له ۲۰۱۲ کال راهیسې په دغه ښار کې تر ټولو ستر اعتراض و.

ورته مطالب