د ګرانۍ له امله ایران کې مظاهرې

ر

د عکس سرچینه، عکسUGC

خواله رسنیو کې ویډیووې او رپوټونه د سې شنبې په ورځ د تهران په کرج او اصفهان کې د بیو لوړېدو له امله د خلکو مظاهرې ښيي.

د دې رپوټونو له مخې لومړۍ د کرج په ګوهردشت او بیا اصفهان کې خلک سړکونو ته وتلي او نارې وهي: ګراني، تورم د خلکو ژوند ته بلا شوي.

په ویډیوو کې د بلوا ضد پولیس هم لیدل کېږي.

په شعارونو کې ویل کېږي: اخوند باید ورک شي. درواغ وايي چې امریکا مو دوښمنه ده، دوښمن مو دلته دی.

بي بي سي ته داسې انځورونه هم رسېدلي چې امنیتي ځواکونه په شخصي جامو کې د ګوهردشت لاریونوال تیت پرک کوي.

په دې مظاهرو کې خلک د پخواني پاچا په ملاتړ هم نارې وهي.

تېرو دوو ورځو کې خواله رسنیو کې له خلکو غوښتل کېدل چې د ګرانۍ له امله مختلفو ښارونو کې مظاهرې وکړي.

وروستیو ورځو کې د ایران ریال د بهرنیو پیسو په تېره ډالر مقابل کې سخت غورځېدلی او دا اونۍ یو ډالر له یوولس زره تومنو- چې یولک لس زر ریال کېږي- برابر دی.

د ایراني ریال ارزښت له هغه وروسته لوېږي چې امریکا له اټومي تړون ووتله او تر راتلونکې یوې اونۍ به بیا هغه بندیزونه پر تهران ولګوي چې د دې تړون له مخې یې ترې لرې کړي وو.

د ټرمپ احساس

د عکس سرچینه، AFP

له بلې خوا د امریکا ولسمشر ډونلډ ټرمپ وايي، داسې احساسوي چې ډېر ژر به ایرانیان ور سره خبرې وکړي.

نوموړي وړمه ورځ ویلي و چې د ایران له ولسمشر سره نېغو خبرو ته چمتو دی.

خو ځواب کې یې د سپاه پاسدارن مشر وویل، چې دا ډول لیدنه به هیڅ وخت ونه شي.

محمد علي جعفري زیاته کړه: "ښاغلی ټرمپ ایران شمالي کوریا نه ده چې ستا په غوښتنه لیدنې ته هو ځواب ووايي".

خو ډونلډ ټرمپ د سې شنبې په ورځ په یوه سیاسي ناسته کې وویل:

زه احساسوم چې دوی به ډېر ژر له ما سره خبرې وکړي، ښايي ونه کړي، خو دا پروا نه لري.

د خبرو لپاره شرایط

د عکس سرچینه، Reuters

د عکس تشریح،

ټرمپ ویل بې شرطه خبرې کوي، خو پمپیو وایي، دا خبرې به شرایط لري.

ډونلد ټرمپ د دوشنبې په ورځ په واشنګټن کې د ایټالیا له لومړي وزیر سره خبرغونډه کې وویل، که ایرانیان ور سره خبرې کول غواړي دی هم چمتو دی.

هغه دا هم وویل، چې له ایراني سیال سره د لیدنې لپاره کوم شرط نه لري،

خو د نوموړي تر خبرو څو ګړۍ وروسته د امریکا د بهرنیو چارو وزیر مایک پمپیو رسنیو ته وویل چې د دا ډول خبرو د بریالیتوب لپاره شرایط هم شته.

د هغه په خبره که ایرانیان د خپلو خلکو په وړاندې د خپل چلن بدلولو کې بنسټيز بدلون را ولي، ورانوونکی چلن پرېږدي، داسې یو اټومي تړون ومني چې په عمل کې د کیمیايي وسلو د پراختیا مخنیوی وکړي هغه وخت به ولسمشر له دوی سره کېتاستلو ته تیار وي او خبرې به ور سره وکړي