عمران خان د امریکا او پاکستان اړیکو ته لا ګواښ جوړوي

امريکايۍ ورځپاڼې نيويارک ټايمز ليکلي چې د پاکستان احتمالي لومړى وزير عمران کولاى شي چې د افغان سولې خبرې اترې پېچلې کړي.

ورځپاڼه وايي د پاکستان او امريکا اړيکې تېره جنورۍ کې وروسته له هغه ډېرې ترينگلې شوې چې ولسمشر ټرمپ پاکستان ته د امريکا نژدې ټولې مرستې ودرولې.

ورځپاڼه وايي، عمران خان چې د طالبانو په ملاتړ يې خبرې کړي او د هغو جگړه يې توجيه کړې د امريکا او پاکستان اړيکو ته لا گواښ جوړوي.

د ورځپاڼې په باور عمران خان پاکستان کې د مشکوکو توندلارو پر وړاندې د امريکا د بې پيلوټو الوتکو د بريدونو له امله امريکا په بې عدالتۍ تورنه کړې او د دغه راز بريدونو د ودرېدو غوښتنه يې کړې.

* 'د عمران خان خبرې د استخباراتي کړۍ زیږنده دي'

* عمران خان: له افغانستان سره پرانيستې پوله غواړو

* ولسمشر غني عمران خان ته مبارکي ورکړې

همدې ورځپاڼې په يوۀ بل مطلب کې جلال اباد ښار کې ملي پوځ ته د امنيتي چارو د سپارلو موضوع ته اشاره کړې.

ورځپاڼې د تېرې ورځې بريد په تړاو ليکلي چې په روان ميلادي کال کې د ننگرهار په مرکز کې پر ملکي موخو لسم بريد و.

ورځپاڼه وايي، دا په ننگرهار کې پر اسانو او زيانمنونکو موخو د داعش د بريدونو د لړۍ يو هغه و.

ورځپاڼې د ننگرهار د والي د وياند عطاالله خوگياڼي په وينا ليکلي دي چې د دغه ولايت چارواکي ډېر اندېښمن شوي او پرېکړه يې کړې چې د ښار د امنيت مسووليت د افغانستان ملي پوځ ته وسپاري.

عرب نيوز

عرب نيوز ورځپاڼې ليکلي، عربستان کې د اوښانو ځينې څښتنان له دې امله ناغه شوي دي چې پر خپلو اوښانو يې د ښکلا جراحي کړې وه.

د ورځپاڼې په وينا دوى هڅه کړې وه چې خپل اوښان د دغه راز جراحۍ په مټ ښايسته کړي.

د سعودي د چاپېريال ساتنې، اوبو او کرنې وزارت پنځه تنه د رفاه له قانونه د سرغړونې په تور ٦٧ زره ريال جريمه کړي چې ١٨ زره ډالر کېږي.