'عمران خان د کورنیو چارو له وزیر پرته ۲۰ کسیزه کابینه تایید کړې'

پاکستان

د عکس سرچینه، EPA/PRESS INFORMATION DEPARTMENT

د عکس تشریح،

عمران خان پر شنبه د لومړي وزیر په توګه لومړه وکړه

د پاکستان لومړي وزیر عمران خان د نوي حکومت تشکیل لپاره د ۱۵ وزیرانو او پنځه سلاکارانو نومونه تایید کړي دي. د عمران خان تحریک انصاف ګوند ویاند فواد چودري د ټویټر پیغام له لارې دغه نومونه خپاره کړي دي.

خپله د فواد چودري نوم د اطلاعاتو او نشراتو د وزیر په توګه تایید شوی دی. په دغه نوملړ کې د بهرنیو چارو د وزیر په توګه د شاه محمود قریشي نوم یاد شوی، خو د کورنیو چارو وزیر د نوم یادونه نه ده شوې.

د خیبر پښتونخوا پخواني اعلی وزیر پروېز خټک نوم د پاکستان دفاع وزیر په حیث یاد شوی دی. عمران خان په خپله کابینه کې د خپل ګوند سیاسي متحدینو ته هم ځای ورکړی دی.

متحده قومي غورځنګ (پاکستان) ګوند ته په کابینه کې د قانون او معلوماتي تکنالوژۍ وزارتونه ورکړل شوي او د عوامي مسلم لیګ ګوند مشر شیخ رشید ته د اورګاډو یا ریلوې وزارت ورکړل شوی دی.

د پاکستان قومي اسمبلۍ یا پارلمان پخوانۍ مشرې فهمیده مرزا ته چې د ګرانډ دیموکراتیک اتحاد مشره هم ده د ایالتونو خپلمنځي اړیکو وزارت او دغه راز د بلوچستان عوامي ګوند زبیده جلال ته د دفاعي تولیداتو وزارت سپارل شوی دی.

د عمران خان یوه بل اتحادي پاکستان مسلم لیګ (ق) ګوند له لوري له پنجاب ایالته ټاکل شوي غړي چودري طارق بشیر چیمه نوم د سرحدي چارو وزیر په توګه منل شوی دی.

د پاکستان تحریک انصاف ګوند مشر عمران خان د جولای میاشتې ټاکنو کې د خپل ګوند له بریا وروسته تېره ورځ د دغه هېواد قامي اسمبلۍ یا پارلمان کې د پاکستان د دوه ویشتم لومړي وزیر په توګه وټاکل شو.