جرمني: د اعتراض په ډول د" هټلرسلام "لېوانو مجسمې نندارې ته اېښودل شوې

A wolf sculpture by artist Rainer Opolka making a Nazi salute is pictured in Dresden, 15 March 2016 د انځور حقوق Getty Images
Image caption ځینې دا ډول سلامونه تر دې وړاندې درېسدن ښار کې هم نندارې ته وړاندې شوي ول.

په داسې یوه هېواد کې چې د نازیانو سمبولونه ناقانونه دي، د لېوه د داسې مجسمې لیدل چې د هټلر په ډول یې سلام کړی وي د معمول خلاف ښکاري.

خو د لوېدیځ جرمني په کېمنتز ښار کې لس د برونزو مجسمې نندارې ته اېښودل شوي چې د نندارې جوړوونکو په وینا د "مخ په ډېرېدونکې کرکې"پر ضد یې اعتراض کړی.

د لېوانو په مجسمو کې ځینې برید ته چمتو دي او د ځینو سترګې تړلې دي.

د جرمني په دغه ښار کې وروسته له هغه اوضاع ترینګلې شوه چې په څو اوونۍ وړاندې د یوه جرمن د وژل کېدو تور په دوو کډوالو پورې شو.

د رپوټونو پر بنسټ افراطي ښی اړخي اعتراض کوونکي تل د هټلر په ډول سلام کوي او کډوالو او خبریالانو پسې وي.

دغو مجسمو ته "لېوان بیا راغلي"نوم ورکړل شوی چې جوړوونکي یې وايي ځکه یې دا غوره کړی چې دواړه، نازیان او اوسني افراطي ښۍ اړخې ډلې ډېری مهال ځانونه "لېوان"بولي.

دغه لېوان د رېنر اوپولکا په نامه هنرمن جوړ کړي او کېمنتز ښار کې د کارل مارکس د مشهورې مجسمې سره به د پنجشنبې تر ماښام پاتې شي.

له دې سره به داسې لوحې ملې وي چې افراطي ښۍ اړخې ډلې د "ټولو ستونزو مور"بولي.

دا د توکمپالنې پر وړاندې په کېمنتز ښار کې لومړنی اعتراض نه دی.

تېره اوونۍ تر ۶۰ زرو ډېرو کسانو د افراطي ښی اړخو پر وړاندې په یوه وړیا کنسرت کې برخه واخیسته.

اړونده مطالب

ورته مطالب