'۲۰۱۸: امریکایانو ته افغانستان کې تر ټولو خونړی کال'

امریکايي عسکر د انځور حقوق AFP/Getty Images
Image caption د ۲۰۱۸ کال له پیله تر اوسه افغانستان کې ۱۲ امریکايي او څلور د نورو هېوادونو سرتېري وژل شوي

نيويارک ټايمز غزني کې د درېيو امريکايي سرتېرو وژل کېدو ته په اشاره ليکي، چې دا سږکال امريکايي ځواکونو لپاره تر ټولو خونړۍ پېښه ده.

غزني کې د سړک د غاړې بم چاودنه کې د درېیو امريکايي سرتېرو د وژل کېدو سربېره د يوۀ قراردادي په گډون درې امريکايي سرتېري ټپيان شوي هم دي.

نيويارک ټايمز ليکي، د امريکا دفاع وزارت په ٢٠١٤ م کال کې اعلان کړى و چې ځواکونه به يې نور جگړييزو ماموريتونو کې نه ښکېلېږي خو د ورځپاڼې په وينا له هغه مهال تر اوسه طالبانو نورې سيمې ولکه کړي او امريکايي ځواکونو هم بېرته د جگړې ډگر ته وردانگلي.

د نیویارک ټايمز په وينا، په افغانستان کې په ٢٠١٥م کال کې ١٠ امريکايي سرتېري، ٢٠١٦ کې نهه ٢٠١٧ کې يوولس سرتېري وژل شوي وو، خو ٢٠١٨ م کال کې تر اوسه ١٢ امريکايي او څلورو نورو بهرنيو ځواکونو خپل ژوند له لاسه ورکړى.

غزني کې درې امريکايي سرتېري وژل شوي

برتانوۍ گارډين ورځپاڼې ليکلي، برتانيا افغانستان کې زياتېدونکي کړکېچونو سره مبارزې لپاره د ٣٥ ميليون پونډو په ارزښت نوې مرسته اعلان کړې.

د ورځپاڼې په وينا، يوۀ نوي خپاره شوي رپوټ کې گواښنه شوې افغانستان کې نيمايي کليوال وگړي چې شمېر يې له لسو ميليونو اوړي ښايي د خوړو له سخت کمي سره مخامخ شي.

دغه رپوټ چې د اى. پي. سي په نامه د خوړو د خونديتابه يوې ادارې لخوا چمتو شوى د ورځپاڼې په وينا وايي د تاوتريخوالي پراخېدا او دوامدارې وچکالۍ چې له امله يې دوه نيم لکه کسان بې ځايه شوي د افغانانو پر عوايدو ناوړه اغېز کړى او د ماشومانو په منځ کې د پراخې خوارځواکۍ لامل شوى.

د انځور حقوق Getty Images
Image caption خليج ټايمز ليکلي چې د ابوظبۍ پوليسو د خواله رسنيو کاروونکو ته لارښوونه کړې چې خپل شخصي انځورونه او ويډيوگانو دې پر دغو رسنيو نه خپروي چې د مجرمينو د باج غوښتنې له گواښ سره مخ نه شي.

د ٣٥ ميليون پونډو په ارزښت کېدونکو مرستو کې خواړه، څښاک اوبه، سلگونو زرو کسانو لپاره خيمې او نورې بشري مرستې شاملې دي. د برتانيا د نړيوالې پرمختيا ادارې پر نورو هېوادونو هم افغانستان سره د مرستې غږ کړى.

پاکستانۍ د نيوز ورځپاڼې اسلام آباد کې د افغانستان د بيارغونې کومېټې د څوارلسمې ناستې په تړاو ليکلي چې د پاکستان د پلان او پراختيا وزير مخدوم خسرو دغې ناستې ته ويلي چې د پاکستان اوسنى حکومت ژمن دى چې د افغان حکومت ترڅنگ درېدو سربېره افغانستان ته ډاډ ورکړي چې ټولې رغنيزې پروژې به پر خپل وخت بشپړې شي.

خليج ټايمز ليکلي چې د ابوظبۍ پوليسو د خواله رسنيو کاروونکو ته لارښوونه کړې چې خپل شخصي انځورونه او ويډيوگانو دې پر دغو رسنيو نه خپروي چې د مجرمينو د باج غوښتنې له گواښ سره مخ نه شي.

پوليسو ويلي هکران هڅه کوي له خواله رسنيو د خلکو شخصي تصويرونه او ويډيوگانې غلا کړي او بيا ترې پيسې وغواړي. پوليسو ويلي دغه ډول گڼې پېښې ثبت شوې دي.

ورته مطالب