د پاکستان پر هوايي حریم ټولې الوتنې لغوه شوې دي

الوتکه د انځور حقوق Getty Images
Image caption د افغانستان له هوايي حریمه هره ورځ له ۴۰۰ تر ۵۰۰ نړیوالې الوتکې تېرېږي.

د افغانستان د ملکي هوايي چلند اداره وایي، د دغه هېواد پر فضا هیڅ ډول ستونزه نشته، خو زیاتوي د پاکستان له خبرداري وروسته، دوی هم پیلوټانو ته خبر ورکړی چې تر دویم خبرداري باید د پاکستان پر فضا ور نه شي.

د ملکي هوایي چلند ادارې مشر محمد قاسم وفایي زاده وایي، د پاکستان د الوتنو د معلوماتي سیستم له خبرداري سره سم هغه ټولې الوتنې ځنډیدلې چې نن پاکستان ته تلې او یا د دې هيواد پر فضا تېریدلې.

ښاغلي وفایي زاده بي بي سي ته وویل، له دې ګامه هغه الوتنې هم اغیزمنې شوي چې نن د ډیلي-کابل او کابل- دوبۍ ترمنځ پلان شوې وې.

له کابل ډیلي ته تلونکې الوتکۍ د پاکستان پر فضا تیریږي او له افغانستان نه دوبۍ او برعکس کابل ته له اماراتو تلونکې الوتکې هم د نیمروز ولایت په سیمه کې یو ځل د پاکستان فضایي حریم ته دننه کیږي.

د افغانستان د هوایي چلند اداره وایي، هره ورځ شاوخوا پنځه سوه نړیوالې ملکي الوتکې د دغه هېواد پر فضا تګ راتګ کوي چې ډیری هغه یې له افغانستانه وروسته د پاکستان فضا ته دننه کیږي.

د هوایي چلند اداره وایي، دوی هند او اماراتو ته د پاکستان له فضا پرته بدیلې هوایي کرښې هم لري، خو وایي، له هغو کوریدورونو تګ را تګ واټن ډېر اوږدوي.

دغه اداره وایي، هر کله چې د پاکستان هوایي حریم د الوتنو پر مخ پرانستل شي، دوی به نړیوالو شریکانو ته خبر ورکړي.

د پاکستان د هوایي چلند ادارې په خپله ټویټر پاڼه لیکلي، تر یوې نامعلومې مودې یې خپل فضایي حریم د ټولو هغو الوتنو پر مخ تړلی چې د دې هېواد پر فضا تیریږي.

د افغانستان له هوايي حریمه هره ورځ له ۴۰۰ تر ۵۰۰ نړیوالې الوتنې تېرېږي.

د افغانستان له شماله سوېل ته ډېری الوتنې د پاکستان پر خاوره او د افغانستان له ختیځه لوېدیځ ته هم پاموړ الوتنې هم د پاکستان پر هوايي حریم کېږي.

محمد قاسم وفايي وايي، هره ورځ له افغانستانه هند او له هنده افغانستان ته اته الوتنې کېدې چې ټولې لغوه شوې دي.

د هند او پاکستان تر منځ اړیکي وروسته تر هغه ترینګلي شول، چې په تېره سه شنبه د هند هوايي ځواک د پاکستان خاوره کې د جیش محمد اورپکې ډله په نښه کړه.

هند او پاکستان یو بل تورنوي چې د بل پر هوایي حریم یې تېری کړی، او پاکستانی پوځ دعوه کوي چې پر کنټرول کرښه له تېرېدو او پاکستان ته اوښتو سره یې د هند دوه الوتکې وغورځولې.

له دې مخکې پاکستان ویل چې الوتکې یې خپله فضا کې وې او پر کنټرول کرښه یې لرې هدف ویشتلی دی.

د پاکستان پوځ دعوه کوي چې پر کنټرول کرښه له تېرېدو او پاکستان ته اوښتو سره یې د هند دوه الوتکې وغورځولې. خو د هند کورنیو چارو وزارت او هوايي ځواک مرستیال مشر وايي، پاکستاني هوايي ځواک سره هوا کې نښته شوې او یوه پاکستانۍ الوتکه یې غورځولې او د دوی یوه الوتکه هم ویشتل شوې ده.

د یادونې ده چې له ۱۹۷۱ کال راهیسې دا لومړی ځل دی چې هندۍ الوتکې د پاکستان خاورې ته رسېدلې دي.

د انځور حقوق FLIGHT RADAR
Image caption د پاکستان او هند ترمنځ له ترینګلتیا وروسته، د پاکستان پر هوايي حریم ټولې سوداګریزې الوتنې لغوه شوې دي

ورته مطالب