ولسمشر ټرمپ د بوینګ ۷۳۷ مکس ډوله الوتکو ځای پر ځای کېنولو امر وکړ

  • 14 مارچ 2019 - 23 کب 1397
د انځور حقوق Joe Raedle

د امریکا متحدو ایالتونو ولسمشر ډونلډ ټرمپ وايي، هېواد یې په ایتوپیا کې د بوینګ ۷۳۷ مکس ډوله الوتکې له غورځېدو وروسته دغه ډول ټولې الوتکې سملاسي ځای پر ځای کېنوي.

له دې مخکې ګڼ شمېر هېوادونو دغه ډول الوتکو ته د الوت اجازه نه ورکوله، د امریکا هوايي چلند ادارې داسې کوم بندیز نه و لګولی. خو د چهارشنبې پر ورځ دغې ادارې ویلي، د ایتوپیايي الوتکې غورځېدو له ځایه د تر لاسه شویو نویو معلوماتو له تر لاسه کولو وروسته یې دغه پرېکړه کړې.

بوینګ به اوس د ۳۷۱ الوتکو خورا لویه ټولګه لغو کوي. د امریکا متحده ایالات وروستی هېواد دی چې دغه بوینګ ۷۳۷ مکس ډوله الوتکې یې ځای پر ځای کېني.

د ایتوپیا پلازمېنه ادیس ابابا کې د یکشنبې پر ورځ د دغه ماډل الوتکې غورځېدو پېښه کې ۱۵۷ کسان ووژل شول. دا د اکتوبر میاشت کې اندونیزیا کې د ورته الوتکې له غورځېدو وروسته چې ۱۸۹ کسان پکې ووژل شول، د مکس ۸ ډوله الوتکو دویمه خونړۍ پېښه وه، چې پنځه میاشتو مودې کې رامنځته شوه.

د امریکا هوايي چلند ادارې چارواکو په وینا د ایتوپیا غورځېدلې الوتکې له پاتې شونيو د نورو تر لاسه شویو معلوماتو د شننې تر مهاله به دغه پرېکړه پر ځای پاتې وي. بوینګ وايي:

''د ډېر احیتاط له کبله الوتکې پر ځمکه کېنوي چې د مساپرو خوندیتوب باوري شي. ''

د امریکن ایرلاین هوايي شرکت په وینا د دغې پرېکړې اغېز به یې پر ۲۴ الوتکو کېږي. شرکت مسوولین وايي: موږ به خپلو مشتریانو ته ژر تر ژره بیا ټکټونه ورکړو او د زخمت ورکولو له کبله بښنه غواړو.

ایتیوپیایۍ الوتکې لوېدلو پېښه کې ۱۵۷ کسان وژل شوي

اندونیزیا: د ۱۸۹ مساپرو الوتکه سمندر کې لوېدلې

له دې مخکې کاناډا چارواکو وویل، د نویو ثبوتونو موندلو له کبله یې دغه ډول الوتکې ځای پر ځای کېنولې دي. د دوی په وینا سټلایټ ډیتا کې لیدل شوي چې د ایتوپیا غورځېدلې الوتکې او کاناډا کې فعالو مکس ۸ ډوله الوتکو د الوت انداز کې ممکنه ورته والی دی.