'بخاري سره کرښه ده'؛ د امام وسیم یوسف تکفیرول

په "صحیح بخاري" کتاب کې د سمون په تړاو د شیخ زاید جومات د امام وسیم یوسف د څرګندونو په اړه اړه پر خواله رسنیو بېلابېل غبرګونونه ښودل شوي.

په سعودي،کویت، بحرین، عمان، قطر او ګڼو نورو خلیجي هېوادونوکې د '#بخاري_سره_کرښه_ده' په نامه هشټګ شاوخوا ۵۰ زره ځلې لاس په لاس شوی چې ملاتړو او مخالفانو پرې خپل نظرونه ښودلي.

د انځور حقوق Getty Images
Image caption صحیح البخاري د مسلمانانو لپاره د نبوي احادیثو تر ټولو معبر کتاب ګڼل کېږي چې ابو عبدالله محمد بن اسماعیل البخاري چمتو کړی دی.

صحیح البخاري

صحیح البخاري د مسلمانانو لپاره د نبوي احادیثو تر ټولو معبر کتاب ګڼل کېږي چې ابو عبدالله محمد بن اسماعیل البخاري چمتو کړی دی.

وسیم یوسف پر خپل ټویټر د یوې وېډیو له لارې په صحیح البخاري کې د راغلو احادیثو په اړه شک ښودلی.

وسیم پخپلو خبرو کې د ناصر الدین الباني هغه خبره دلیل راوړی چې په صحیح البخاري کې ځینې احادیث ضعیف ګڼي او وايي چې: ''د الله له کتاب پرته، نور هغه د بشر لیکنه ده،" چې اشاره یې د اسلام پیغمبر حضرت محمد ته په ځینو منسوبو احادیثو د شک شونتیا ښودل دي.

یوسف وايي پر بخاري د الباني شک نیوکه نه ده، چې ځینو یې د تکفیر غوښتنه کړې ده.‌

هغه پخپل ټویټر لیکلي: "له نبیانو پرته معصومیت بل چا ته نه شته، هر څوک چې له انبیاوو پرته بل چا ته معصومیت ورکوي، په اصل کې د الله له دین سرغړونه کوي."

'#بخاري_سره_کرښه_ده'

د وسیم له څرګندونو وروسته، پر خواله رسنیو ګڼ غبرګونونه وښودل شول، چې مخالفانو او نیوکګرو د '#بخاري_سره_کرښه_ده' هشټګ وکاراوه.

محمد الیحیا ویلي: "پر صحیح البخاري برید د هغې اوږدې لارې یو ګام دی چې په مټ یې له خپل دین نه د نوي نسل د باور کمولو موخه لري او پر ځای یې داسې کلتور رایجول غواي چې له موږ سره ورته والی نه لري او نه زموږ عظیم اسلام ته ورته دی."

محمد علي المحمود ویلي: "چې وايې: بخاري سره کرښه ده،‌ په دې معنا چې انسان سپېڅلی بولې، او د خدای له کتاب پرته بل شي ته معصومیت ورکوې.‌ بخاري - رحمه الله - د خپل کتاب چمتو کولو کې زیار ایستلی، او هر مجتهد د بېلابېلو لاملونو له کبله تېروځي هم."

موزه غباش

بل خوا اماراتۍ اکاډیمیکې موزه غباض پر خواله رسنیو وروسته تر هغه د خلکو پام ځان ته واړاوه چې د صحیح البخاري په اړه یې لیکلي وو او دا یې یو "وروسته پاتې کتاب" بللی و. هغې ویلي وو "موږ په هغو کتابونو کې ځان نه شو بندي کولی چې عمر یې ۱۴۰۰ کاله دی."

خو وروسته موزه غباش پر ټویټر بخښنه وغوښته: "د قوانینو او د تشریح د سرچینو بحث کې د بخاري کتاب په اړه ما سم تعبیر ونه شو کړی، او د قوانینو د سرچینو په باب د بېلګې په توګه د کتاب له یادولو زما موخه هماغه کتاب نه دی، زه بخښنه غواړم."