د نړۍ تر ټولو لوړ غره پر څوکه د انسانانو بیروبار

اېورسټ د انځور حقوق AFP/ Project Possible
Image caption د غره پر څوکه د انسانانو بیروبار تود بحث را پارولی دی

د نړۍ د تر ټولو لوړ غره "ماونټ اېورسټ" پر څوکه د غره ختونکو د ګڼې ګوڼې یو انځور پر نړیواله کچه تود بحث را پارولی دی.‌ هر کال د نړۍ له ګوټ ګوټه غره ختونکي نیپال ته ځي او هڅه کوي‌ چې د دې غره څوکې ته وخېژي.

خو سږ کال چاپېریال ساتونکي او فعالان د نیپال پر حکومت نیوکه کوي چې ۳۸۱ کسانو ته اجازه ورکړې وه چې د یاد غره سر ته ور وخېژي.

ویل کېږي چې ځایي‌ شرایطو ته په کتو سره پر یو وخت هلته د دومره ډېرو کسان شتون لانجمن کار دی.‌

خو د نیپال حکومت د هر جواز په بدل کې له غره ختونکو ۱۱ زره ډالر اخلي.

خو روان موسم کې ټولټال ۱۰ غره ختونکي ماونټ اېورسټ ته د ختلو او یا هم بېرته د را ښکته کېدو پر مهال وژل شوي دي.

همدې وضعیت په نړیوال کچه د غره ختونکو د خوندیتوب په اړه بحث را پارولی او د نیپال پر حکومت هم نیوکې کېږی چې د لا ډېرې ګټې لپاره د خلکو له ژوند سره لوبې کوي.‌

له سیمې رپوټونه وایي، د غره په لمنو کې د خلکو ګڼه ګوڼه تر اندازې ډېره ده او پاس څوکې ته نژدې د غره ختونکو کتارونه جوړ شوي‌ او ټول هڅه کوي چې هدف ته ځان ورسوي.‌

چاپېریال ساتونکي نیوکه کوي چې انسانان د خپل خوند او ساعتېرۍ لپاره له طبیعت سره لوبې ونکړي.

د انځور حقوق Handout
Image caption برتانوی رابن فیشر روانه اونۍ د غره ختنې پر مهال وژل شوی

یوازې په روانه اونۍ کې د ماونټ‌ اېورسټ په لمنه کې څلور هندیان،‌ دوه برتانویان،‌ یو نیپالی،‌ یو امریکایی او یو اتریشی وګړی وژل شوي‌ دي.‌

کارپوهان وایي، د مارچ او می میاشتو ترمنځ موده د ماونټ‌ اېورسټ څوکې ته د ختلو لپاره تر ټولو مناسبه ده،‌ ځکه هوا توده وي او باو او باران کم وي.

خو سږ کال برعکس له سیمې نه د تېزو توپاني بادونو رپوټونه ترلاسه شوي، او غره ختونکي څوکې ته د رسېدو لپاره بیړه کوي.‌

له همدې کبله دوی پر ځان له فزیکي پلوه ډېر فشار راوړي چې وروسته یې بدن ورسره مقاومت نشي‌ کولی او د مړینې لامل کېږي.‌

تېر ۲۰۱۸ کال کې ټولټال ۸۰۷ کسان د ماونټ اېورسټ څوکې ته ختلي وو،‌ چې تر اوسه په یوه کال کې رېکارډ شمېر دی.‌

خو چارواکي وایي د سږ کال تر دې دمه شمېر ته په کتو سره ښایي د تېر کال رېکارډ مات شي.

ورته مطالب