پر بېوزله هندۍ کورنۍ میاشت کې یو میلیارد برېښنا بل راغلی

هندي کورنۍ د انځور حقوق ANI UP

هندي او ځینو نورو رسنیو رپوټ ورکړی چې په دې هېواد کې يوې کورنۍ ته څه د پاسه يو مليارډ هندي روپۍ د برېښنا مياشتنى بېل ورغلی.

خو بېل کې کارول شوې برېښنا دوه کيلو واټه ښوول شوې.

ګلف نیوز لیکلي، د دوه کیلو واټه برېښنا لپاره دغې کورنۍ ته د ۱،۲۸۴،۵۹۵،۴۴۴ هندي روپیو بېل ورغلی.

د هند اترا پرادېش د هاپور چمري کلي کې یوه عمر خوړلې جوړه چې ورته د برېښنا دا بې سارى بېل ورکړل شوى د برېښنا ادارې ته ورغلې چې دا تېروتنه سمه کړي، خو وايي چا يې خبره نه ده اورېدلې او ورته ويل شوي برېښنا به يې تر هغه پرې وي چې دا پيسې ورکړي.

د کورنۍ مشر شميم ويلي تر دې مخکې به یې د برېښنا مياشتنى بېل ٧٠٠ يا ٨٠٠ روپۍ وې خو داسې برېښي چې دا ځل يې د ټول ښار لگښت دوى پسې ليکلى.

د برېښنا د ادارې لوړپوړو چارواکو ويلي دا به ښايي يوه تخنيکي تېروتنه وي او دوى به یې سم کړي خو تر هغه چې دا تېروتنه سمېږي نو شميم او کورنۍ به يې په تياره کې شپې سبا کوي.