هند کې د پړانګانو نفوس بېرته په ډېرېدو دی

پړانګ د انځور حقوق AFP
Image caption هند د نړۍ ۷۰ سلنه پړانګانو مېشت ځای دی

وروستۍ شمېرې ښيي چې هند اوس د څلور کاله پخوا پرتله د درې برابره ډېرو یانې د ۳۰۰۰ پړانګانو کور دی. لومړي وزیر نرېندرا مودي د دوشنبې پر ورځ د هندي پړانګانو نوي شمېر وړاندې کولو پر مهال وویل، مخکې یې شمېر څه باندې ۲۲۰۰ وو، خو اوس دا شمېر څه کم درې زره پړانګانو ته رسېږي.

د پړانګ ژغورنې تصویر لپاره جایزه

محکمې ولې د پړانګ وژلو امر تایید کړ؟

زمرۍ د پړانګ بچي ته شیدې ور کوي

نوموړي زیاته کړه:

''هند اوس په نړۍ کې د پړانګانو لپاره تر ټولو لوی او خوندي کور دی. ''

د اټکل له مخې ویل کېږي چې هند کې دا مهال د ټولې نړۍ اویا سلنه پړانګان ژوند کوي. هندیان له هرو څلورو کلونو وروسته خپل پړانګان شمېرې او دې بهیر کې د ځنګلونو ساتنې ګڼ کارکوونکي او ساینسپوهان په نژدې نیم میلیون کیلومتره پراخه ساحه کې ژوندي پړانګان معلوموي.

ښاغلی مودي وايي، د پړانګانو وروستی شمېر به ( هر هندی خوشحال کړي.) خبریالان وايي، د پړانګانو شمېر ډېرېدو ته د لویې بریا په نظر کتل کېږي، ځکه اټکلونه ښيي هند کې یوازې د ۱۸۷۵ او ۱۹۲۵ کلونو تر منځ نژدې ۸۰ زره پړانګان وژل شوي وو.

پخوانو چارواکو، نوابانو او شتمنو به له بېلا بېلو لارو د انعام او یا ښکار لپاره هندي پړانګان وژل چې له ۱۹۶۰ کلونو راوروسته یې شمېر په کمېدو شو.

خو وروسته د پړانګانو پر شمېر د بندیزونو تر څنګ په کلیوالو سیمو کې د عامه پوهاوي له حکومتي پروګرامونو سره د پړانګانو ژغورنې برخه کې پام وړ بریا رامنځته شوه. ۱۹۷۲ کال کې د وحشي ژویو پر نیولو او وژلو کلک بندیز او د ځنګلونو ساتونکو له شمېر ډېرېدو وروسته دې برخه کې نور پرمختګ هم وشو او له ۲۰۰۶ کال راهیسې د پړانګانو شمېر برخه کې مثبتې پایلې په څرګندېدو شوې.

د انځور حقوق Getty Images

خو د دې تر څنګ په هند کې پر انسانانو او پړانګانو تر منځ د مخامختیا پېښې هم ډېرې شوې، چې د کارپوهانو په وینا وجه یې په هند کې د ځنګلي ساحو لږوالی دی چې د پړانګانو ازادانه ګرځېدو، راګرځېدو ته ښايي بسنه نه کوي.

له همدې امله کله نا کله دغه پړانګان په خوړو پسې له ځنګلونو بهر وځي او د نژدې سیمو له اوسېدونکو انسانانو سره مخامخېږي.