د هند پارلمان 'درې طلاقه' جرم بللی

ښځې د انځور حقوق Getty Images
Image caption تېر کال چې د هند عالي دېوان درې ګونی طلاق ممنوع اعلان کړ، ځینو مسلمانو ښځو خوښۍ وکړې

د هند پارلمان د دولت یوه داسې لایحه تصویب او مثبت رایې ورکړې چې په هېواد کې د ښځو درې طلاقه پکې جرمي عمل ګڼل شوی دی.

تر دې وروسته به هغو سړیو ته تر درېیو کلونو د بند سزا ورکول کېدای شي چې خپلو ښځو ته درې طلاقه ورکوي.

د تېر کال اسد/زمري میاشت کې د هند عالي دېوان قاضیانو په هېواد کې د مسلمانانو ترمنځ د درېیو طلاقونو ورکول له اساسي قانون سره په ټکر کې بللی و چې باید لغوه شي.

قاضیانو دا رایه وروسته تر هغه ورکړه چې د درېیو طلاقونو د ناقانونه کولو غوښتنو ته د رسېدو دوسیې څېړل کېدې.‌

د اسلامي قانون له مخې،‌ یو مسلمان ښځې ته د درېیو طلاقونو ورکولو اجازه لري چې د 'طلاق' توری درې ځلې پکې تکرار کړي. ځینې هندي مسلمانو سړیو له دغه دود نه په ګټې اخیستو د لیک، تیلیفوني اړیکې او په پای کې د پیغام استولو له لارې خپلې ښځې طلاقې کړې دي.

یو کال وړاندې د هند عالي دېوان د مسلمانانو منځ کې درې طلاقه ممنوع کړي وو او له دولته یې غوښتي وو چې دا لایحه پارلمان ته یوسي.

ددغې لایحې پلویانو دا د مسلمانو ښځو د ساتنې لپاره د دولت یو ښه ګام بللی و خو مخالفانو یې ویل چې ټاکل شوې سزا درنه ده.

په دې وسیله کې د غږ اوريدل او ویډیو لیدنه شونې نه ده.
هند کې د طلاق مسله

د ښځې درې طلاقه د بېرته ستنېدو د نفي او له هماغه سړي سره د بیا نه واده کولو په معنا دي مګر په هغه حالت کې چې ښځه له یوه بل سړي سره واده وکړي او دا سړی مړ شي او یا طلاق ورکړي.

د هند واکمن ګوند بهاراتیا جاناتا یا بي جې پي ددغې لایحې پلوی و خو د هند کانګرس د دولت مهم مخالف ګوند مخالفت ورسره کړی و.‌

د عالي شورا خلاف، ‌د دولت لایحه په ۹۹ موافقو رایو او ۸۴ مخالفو رایو د هند پارلمان کې تصویب شوه.

د انځور حقوق Getty Images
Image caption د دولت د لایحې ځینو مخالفو مسلمانو ښځو د درې ګوني طلاق ممنوع اعلانولو وروسته مظاهره وکړه

د هند لومړي وزیر نرېندرا مودي په یوه ټویټ کې دا پېښه د "جنسیتي عدالت بریا" بللې او د تصویبېدو هرکلی یې کړی.‌

ددغه ګام مخالفانو د مسلمانانو پر وړاندې د ملي هندوپالو یو ګام بللی دی. د هند پارلمان کې یوه مسلمان استازي په یوه ټویټ کې دا لایحه پر اسلامي هویت د بي جې پي ګوند یو بل برید بللی دی.

وړاندې زرګونو مسلمانانو د ښځو د درېیو طلاقونو د ناقانونه کولو په تړاو یوه اوږد لیک لاسلیک کړی و.‌

په هند کې یوه اسلامي سازمان ویلي وو، د طلاق دا چلن په ډېرېدو دی، خو د ښځو د درېیو طلاقونو دقیقې شمېرې نه شته.‌

ورته مطالب