اسټرالیا کې کمسارې واوره ورېدلې

  • 13 اګست 2019 - 22 زمری 1398
په دې وسیله کې د غږ اوريدل او ویډیو لیدنه شونې نه ده.
نیو ساوت ویلز سیمه کې ګنګرو لیدل کېږي چې واوره کې منډې وهي

په نویو خپرو شویو ویډیويي کلیپونو کې د اسټرالیا یوه داسې کرونده کې چې په واورو پټه ده، کنګرو حیوانان لیدل کېږي منډې وهي.

د دغه هېواد په دریو سویل ختیځو ایالتونو کې له سختو سړو بادونو وروسته د هېواد په ځینې برخو کې کمسارې واوره اورېدلې.

اسټرالیا کې د تودوخې درجې ریکارډ مات کړ

داسې مار موندل شوی چې درې سترګې لري

یوه ټویټر کاروونکي سټېفن ګرینفیل په داسې حال کې د ځغاستونکو ګنګرو ویډیويي کلیپ اخیستی چې له دغې سیمې په روان موټر کې تېرېده. نوموړي پر ټویټر د دغه کلیپ له خپورلو سره پیغام کې لیکلي:

''دا داسې څه نه دي چې هره ورځ یې په اسټرالیا کې لیدلای شئ، په واوره کې کنګرو. ''

په ځواب کې یوه بل کاروونکي هم د همدغه ژوي داسې انځور خپور کړی چې د ګالف له واورو ډک میدان کې اخیستل شوی دی.

هوا پېژندونکي وايي، دا په تېرو کلونو کې د یخنۍ یوه ډېره سخته څپه ده چې اسټرالیا کې راغلې ده.

پلازمېنه کنبرا کې ځايي رسنیو د اسټرالیايي سبک یوه فوټبال سیالۍ رپوټونه خپاره کړي چې په واوره کې تر سره شوې ده. له سډني بهر د واورو له کبله د لویو لارو بندیدو رپوټونه هم خپاره شوي دي.

د هېواد په سویل کې ویل کېږي، چې د نژدې لس زره کورونو برېښنا پرچا شوې او الوتنې لغوه شوې دي.

اسټرالیا کې تېر کال خورا شدید موسم و، چې له کبله یې ونو - بوټو کې اور ولګېد، توپاني بادونه پکې چلیدل او سیلابونه راوختل. دغه هېواد کې اوږدې وچکالۍ هم کلیوالو سیمو کې سخت اغېز درلود.

ورته مطالب