د جنسي اړیکو ناندرۍ: ایا ټرمپ دوه ښځو ته پیسې ورکړې وې؟

ټرمپ د انځور حقوق Getty Images
Image caption دوه جلا ښځو ادعا کړې ده چې له ولسمشر ټرمپ سره یې یارانه درلوده

په امریکا کې یوه قاضي ولسمشر ډونلډ ټرمپ ته امر کړی دی چې په نیویارک کې یوې پلټونکې ډلې ته په تېرو اتو کلونو کې د خپلې مالیې په اړه بشپړ حساب او مالومات ورکړي. قاضي وېکټر مرېرو د ښاغلي ټرمپ د مدافع وکیلانو دا استدلال رد کړ چې ولسمشر له هر ډول پلټنو مصونیت لري.

د ولسمشر مدافع وکیلانو له دې پرېکړې سملاسي وروسته لوړې محکمې نه د استناف غوښتنه کړې.

پخپله ولسمشر ټرمپ هم پر خپله ټوېټر پاڼه لیکلي، دیموکراتان هڅه کوي چې په نیو یارک ایالت کې د دیموکراتو څارنوالانو په مرسته ده ته ستونزې جوړې کړي.

له ۱۹۶۰ راهیسې له جېرالډ فورډ وروسته ډونلډ ټرمپ د امریکا یوازینی ولسمشر دی چې د خپلې مالیې په اړه یې مالومات ډاګیزه کړي نه دي.

د قاضي دا امر به د هغې جلا قضیې پلټنه کې مرسته وکړي چې پکې ویل کېږي، ولسمشر ټرمپ د جنسي اړیکو په بدل کې دوه ښځو ته پیسې ورکړې وې.

قاضي مرېرو په خپله ۷۵ پاڼې پرېکړه کي ویلي، ولسمشر ته اجازه نشي ورکولی چې ځان له قضایي بهیره پورته وګڼي.

اصله قضیه څه ده؟

د انځور حقوق Getty Images
Image caption ولسمشر ټرمپ د دواړو ښځو ادعاوې رد کړې دي

پر ولسمشر ډونلډ ټرمپ تور دی چې د خپل پخواني وکیل مایکل کوهن په لاس یې دوه ښځو ته د جنسي اړیکو په بدل کې پیسې ورکړې دي.

په دې دوه ښځو کې یوه د بربنډو فلمونو ستورې سټورمي ډنیلز او بله یې پخوانۍ ماډله کرېن مېکډګل ده.

دواړه ښځې ادعا کوي چې له ولسمشر ټرمپ سره یې یارانه وه او جنسي اړیکې یې ورسره درلودې، خو ولسمشر ټرمپ دا ادعاوې رد کړې دي.

اوس په نیویار کې یو څارنوال غواړي د ولسمشر ټرمپ بانکي حساب کتاب وګوري، او دا مالومه کړي چې ایا په رښتیا هم نوموړي د خپل وکیل په لاس پاس یادو شویو دوه ښځو ته پیسې ورکړې وې او که نه.

ولسمشر ټرمپ تر دې دمه د نیویارک د څارنوال دا غوښتنه نه ده منلې او پلټنو کې یې مرسته نه ده کړې.

خو که د قاضي وېکټر مرېرو نننۍ پرېکړه پر ځای پاتې شي او د ولسمشر ټرمپ د مالیې په اړه مالومات ډاکیز شي، دا به د نیویارک څارنوال پلټنو سره هم مرسته وکړي.

د انځور حقوق Getty Images
Image caption د ټرمپ پخواني وکیل اعتراف کړی چې د کمپاین ورځو کې یې پردې تر شا مالي معاملې کړې وې

بله موضوع دا ده چې ویل کېږي ولسمشر ټرمپ دې ښځو ته د خپل ټاکنیز کمپاین پر وخت پیسې ورکړې دي.

د امریکا قانون ټاکنیزو نوماندانو ته اجازه نه ورکوي چې په دې ډول د پردې تر شا مالي معاملې وکړي، په ځانګړې توګه که دا معامله د دې لپاره شوې وي چې د هغه نوماندۍ ته زیان ونه رسېږي.

یاده دې وي چې ولسمشر ټرمپ پخواني وکیل مایکل کوهن وار د مخه اعتراف کړی چې د ۲۰۱۶ کال ټاکنیز کمپاین پر مهال یې د پردې تر شا پټې مالي معاملې کړې وې.

نوموړی دا مهال د ټاکنو قانون ماتولو په تور له درې کلنې سزا سره مخ دی.

ورته مطالب