په عمر بند محکوم اویغوري ته سخاروف جایزه ورکول کېږي

ایلهام توختي د انځور حقوق Getty Images

هغه چینايي علمي شخصیت ته د اروپا پارلمان تر ټولو لویه جایزه ورکړل شوې چې د بېلتون پالنې تورونو له کبله چین کې زنداني دی.

الھام توختي چې خپله هم د چین اویغور توکم اړوند دی، له دغه توکم سره د چینايي حکومت پر چلند سختې نیوکې کړې او په ۲۰۱۴ کال کې د عمري زندان سزا ورکړل شوې.

رپوټونه وايي، د چین په شینجیانګ ایالت کې د اویغور لږکيو نژدې یو میلیون کسان په کمپونو کې ساتل کېږي.

که څه هم خپله ښاغلی توختي چې یو معتدل شخصیت بلل کېږي د بېلتون پالنې تورونه رد کړي دي، خو نوموړی داسې شخصیت بلل کېږي چې په شینجیانګ کې یې توکمیز تاوتریخوالي ته د خلکو پام اړولی.

امریکا د اویغور مسلمانانو پر موضوع چینایانو ته پر ویزا محدودیتونه لګوي

شینجیانګ کې 'چارواکي مسلمان ماشومان له کورنیو بېلوي'

نوموړي ته به د سخاروف په نامه جایزه داسې حال کې د ستراسبرګ ښار مراسمو کې ورکړل شي چې خپله لا هم په زندان کې دی.

د چین حکومت پر نوموړي د بېلتون پالنې او د توکمیز تاوتریخوالي اور ته د لمن وهلو تور پورې کړی دی.

خو د اقتصادي چارو دغه څېړونکي پر زنداني کولو د بشري حقونو فعالانو، ملګرو ملتونو، اروپايي ټولنې او امریکا متحده ایالتونو نیوکې کړې او د نوموړي خوشي کولو غوښتنه یې کړې.

د انځور حقوق Getty Images

اروپايي پارلمان وايي، نوموړی د چینایانو او اویغور قبیلې تر منځ خبرو ته د هڅونې له کبله د سخاروف جایزې وړتیا لري.

د اروپايي پارلمان مشر ډېوډ ساسولي وايي:

''اروپايي پارلمان له چینايي چارواکو غواړي چې نوموړی سملاسي خوشی کړي. ''

اروپايي پارلمان دغه معتبره جایزه هر کال د شوروي اتحاد مخالف او فزیکپوه اندرې سخاروف په یاد ورکوي.

اړونده مطالب

ورته مطالب