پاکستان: اورګاډي کې اورلګېدنې ۷۴ کسان وژلي دي دي

پاکستان د انځور حقوق Reuters

د پاکستان له ساحلي ښار کراچۍ نه راولپنډۍ ته روان ریل ګاډي کې د اور لګېدنې له کبله لږ تر لږه ۷۴ مسافر وژل شوي دي. پېښه د پنجاب ایالت سویلي ښار رحیم یار خان ته نژدې شوې ده.

پېښه کې ۴۰ کسان ټپیان دي او چارواکي د وژل شویو کسانو شمېر ډېرېدو اندېښنه څرګندوي.

لومړي وزیر عمران خان په یوه ټویټر پیغام کې د پېښې په تړاو ژور خفګان څرګند کړی او وايي، د پېښې څېړنې امر یې کړی دی.

د پاکستان ریلوې وزیر شیخ رشید احمد وايي، اور د ګاز هغې ډبې چاودنې له کبله پیل شوی چې مساپرو په ګاډي کې د ناشتې یا سباناري پخولو لپاره له ځان سره لېږدوله.

د انځور حقوق PAKISTAN RAILWAYS
Image caption چارواکي وايي، پېښه د ګازو ډبو پورې تړل شویو نغریو له کبله لګېدلی

رپوټونو کې ویل شوي دي، وروسته دغه اور د ګاډي دریو واګونونو یا ډبو کې خپور شوی دی.

ځايي رسنۍ د چارواکو له قوله وايي، ډېر کسان هغه مهال ووژل شول چې له اوره د ځان ژغورلو لپاره یې له رېل ګاډي ټوپونه ووهل.

رپوټونو کې ویل شوي، پېښه کې وژل شوي ډېر کسان لاهور ښار ته نژدې کلنۍ مذهبي اجتماع کې د ګډون لپاره روان وو، چې تبلیغي جماعت یې تنظیموي.

ویل کېږي چې د همدي تبلیغي مسافرو رسولو کې د مرستې لپاره ریل ګاډي لاره بدله کړې وه. رپوټونو کې دا هم ویل شوي چې ډېر وژل شوي کسان د میرپور خاص سیمې اوسېدونکي دي، چې مذهبي اجتماع کې ګډون ته روان وو.

جمشید پټان نومي ژوندي پاتې کس بي بي سي اردو څانګې ته وویل، د سهار لمانځه له ختمېدو سملاسي وروسته دی او ملګري مسافر یې پوه شول چې اورګاډي اور اخیستی.

د انځور حقوق Getty Images
Image caption ډېر وژل شوي کسان د میرپورخاص سیمې اوسېدونکي وو چې مذهبي اجتماع کې ګډون ته روان وو

ریلوې وزیر شیخ رشید احمد وايي، ''دوه ګازي نغري چاودلې او دوی چې پخلی کاوه، نو غوړي هم ورسره وو او همدا غوړي د لمبو پراخیدو سبب شوي دي. ''

ښاغلی احمد وايي، خلک ګازي ډبې د اوږدو سفرونو پر مهال د خوړو پخولو لپاره له ځان سره ګرځوي، چې دا یوه ستونزه ده. که څه هم د ریل ګاډي سفرونو کې د خوړو ګرځول معمول دی، خو د ګازي ډبو پر لېږدولو بندیزونه لګېدلي دي.

په دې وسیله کې د غږ اوريدل او ویډیو لیدنه شونې نه ده.
پاکستان کې د اورګاډي اور ۷۳ کسان وژلي

خو ځینو نورو رپوټونو کې بیا دا هم ویل شوي چې دا اور د برېښنا د مزو سوځېدو له کبله پیل شوی. ځینې ژوندي پاتې مساپر په دې باور دي چې د ریل ګاډي په برېښنايي تارونو کې لګېدلی اور پراخ شو، چې وروسته د واګنونو لرګینو څوکیو او دیوالونو ته ورسېد.

له دې پېښې وروسته د ریل ګاډو تګ راتګ ځنډول شوی و، خو وروسته د ریلوې وزیر وویل، اوس دغه تګ راتګ له معمول سره سم بېرته پیل شوی دی.

ورته مطالب