د ټرمپ د استیضاح اړوند لومړنی پرېکړه لیک تصویب شو

نانسی پلوسی رئیس مجلس می گوید اجازه خواهد داد "واقعیات جلوه گر شود"

د عکس سرچینه، Getty Images

د عکس تشریح،

نانسي پلوسي وايي هڅه کوي واقعیت روښان شي.

د امریکا ولسي جرګې د دغه هېواد د ولسمشر ډونلډ ټرمپ د پلټنو بهیر د رسمي کولو لپاره پرېکړه لیک تصویب کړ.

دې طرحې ته- چې د پلټنو د څرنګوالي په لا ډېر ډاګیزولو ټینګار کوي- د ډیموکراټانو په موافقت، خو د ټولو جمهوريپالو په مخالفت سره ۲۳۲ مثبنې او ۱۹۶ منفي رایې ور کړل شوې.

دا د نوموړي د استیضاح لپاره د ډیموکراټ ګوند د غړو د ملاتړ کچه ښيي چې ولسي جرګه یې په واک کې ده.

یوازې دوو ډیموکراټانو د دې پرېکړه لیک ضد رایه ور کړه.

دا پرېکړه لیک د ښاغلي ټرمپ حقونه او دې ارزونه کې د نوموړي د وکیلانو شتون تضمینوي.

ډونلډ ټرمپ تورن دی چې پر اوکراین یې فشار راوړی چې د خپل سیاسي سیال جوبایډن او زوی هانټر په هکله یې پلټنې وکړي.

هانټر بایډن څو کاله مخکې- چې پلار یې د امریکا مرستیال ولسمشر و- په اوکراین کې د بوریسما انرژۍ شرکت د اداري پلاوي غړی شو.

سپینې ماڼۍ دا پرېکړه لیک غندلی دی.

دا پرېکړه لیک پلټنو ته نوی لوری ور کوي چې له امله یې د ولسمشر پرضد تورونه هم برابرېدی شي او که داسې وشي او ولسي جرګه د تورونو طرحې ته رایه ور کړي یا هغه استیضاح کړي، نو مشرانو جرګه محاکمه برابروي.

پرېکړه لیک څه وايي؟

د عکس سرچینه، Getty Images

لومړي پړاو کې د ولسي جرګې د اطلاعاتو کمېټه راتلونکو اونیو کې د شاهدانو د شهادت اورېدو لپاره ښکاره غونډې جوړوي.

دا کمېټه هغه شهادتلیکونه هم ښکاره کولی شي چې مخکې په خصوصي ډول ټول شوي دي.

دویم پړاو کې د پلټنې د موندنو په هکله ښکاره رپوټ قضايي کمېټې ته استول کېږي، چې "د استیضاح یا نورو سپارښتنو" په هکله رپوټ ور کړي.

د ښاغلي ټرمپ وکیلان اجازه لري چې د قضايي کمېټې د پلټنو بهیر کې ګډون وکړي.

د استیضاح د پلټنو دلیل

د عکس سرچینه، Getty Images

د عکس تشریح،

پخواني ولسمشران بېل کلنټن او اېنډریو جانسن هم استیضاح شول، خو مجرم ونه بلل شول او په دنده پاتې شول.

دې پلټنو کې چې تېره میاشت د ولسي جرګې مشرې نانسي پلوسي اعلان کړې، د ولسمشر ټرمپ او د هغه د اوکرایني سیال ویلادیمیر زلنسکي ترمنځ ټلېفوني خبرې مرکزي ټکی دی.

د دې خبرو متن چې تراوسه ښکاره شوی ښيي چې ښاغلی ټرمپ د بایډنیانو په هکله د پلټنو غوښتنه کوي.

جوبایډن د ۲۰۲۰ کال ولسمشرۍ ټاکنو کې له ډونلډ ټرمپ سره د سیالۍ لپاره د ډیموکراټ ګوند پیلیزو سیالیو کې مخکښ نوماند دی.

یوه افشاګر کارمن د هغو ټلیفوني خبرو په هکله خپله اندېښنه اړوند ادارو ته رپوټ کړې ده.

تراوسه د نوموړي پېژندګلي پټه پاتې شوې ده، خو یوه ساتنپالي لیکوال د چارشنبې په ورځ دا کس د سي ای اې غړی وباله.