د ترکیې د مذهبي ادارې ویډیو سخت غبرګونونه پارولي

Scene from video showing woman serving tea to husband as he looks at his phone د انځور حقوق DIYANET

د ترکیې مذهبي چارو اعلی ادارې له لوري د موبایل ټیلیفون له حده ډېر استعمال په تړاو د خبرداري پر خپرې شوې ویډیو سختې نیوکې شوې.

د مذهبي چارو یا 'دیانت ' له لوري پر ټویټر دغه خپور شوی ویډیويي کلیپ د جنسیتي تبعیض بېلګه او د مساوات یا برابري خلاف چاره بلل شوې.

دغه ویډیو کې چې د نومبر پر شپږمه خپره شوې، یوه ښځه داسې حال کې لیدل کېږي چې میړه ته یې د چایو ډک ګیلاس نیولی، خو هغه له خپل موبایل سره داسې بوخت دی، چې ښځې ته یې هېڅ پام نه شته.

په ویډیو کلیپ کې ښځه خپل مېړه لپاره د کېک دوې ټوټې او یوه پنجه یا خپړه هم راوړي، خو مېړه یې د هغې له شتوالي بې خبره ښکاري.

له دې وروسته دغه ښځه د مېړه څنګ ته کېني او په یوه لیکلي پیغام کې هغه ته وايي:

''ته باید ډېره توجه خپلې مېرمنې ته وکړې! ''

د انځور حقوق TWITTER/@DIYANETBASIN

له دې وروسته د مېړه پام ښځې ته اوړي او کېک ورسره شریکوي. دغه مهال له ویډیو سره لیکلي لیدل کېږي:

''خپل موبایل ته مه ګورئ، د دې پر ځای د خپلې مېرمنې مخ ته وګورئ! ''

دغې ویډیو پر خواله رسنیو په ترکیې ټولنې کې د ښځې رول تصور په تړاو له غوسې ډک غبرګونونه پارولي، چې د ۲۰۱۸ کال اکانومیک فورم جنسیتي برابرۍ رپوټ له مخې د ۱۴۹ هېوادونو په لیست کې ۱۳۰ ځای لري.

خبریالې مینیکسي توکیایې پر ټویټر په دې تړاو ولیکل:

''کله به دغسې کلیشه يي تصور پرېږدو چې ښځه دې چای راوړي، ښځه باید کېک هم راوړي، او دا هم په اوسنۍ زمانه کې... ۲۰۱۹ کال دی ''

د بوکر جایزې ګټونکې ترکۍ لیکواله الیف شفق هم دغه بحث ته ورګډه شوې او له ترکو ښځو یې غوښتي چې دغه پیغام رد کړي. ''

د فېمینیسټو ترکانو ډلې 'مور دایانیسما ' بیا پر خپل انسټاګرام پاڼه د دغې ویډیو پیغام بدل کړی او لیکلي یې دي:

''موبایل ته دې مه ګوره، پاڅه او ځان ته چای چمتو کړه.!

بل لور ته د دیانیت ادارې مشر علي ارباس د ویډیو له خپرېدو څو ساعته وروسته د ټویټر له لارې دغو نیوکو ته په اشارې سره وویل، دوی د نیوکو هرکلی کوي، خو په وینا یې ''خو دا خواشینونکې ده چې نیوکې پر سپکاوي او (لفظي) بریدونو واوړي. ''

د انځور حقوق ANADOLU AGENCY/GETTY IMAGES
Image caption د ترکې مذهبي چارو ادارې مشر علي ارباز له ولسمشر رجب طیب اردګان سره

د رسنیو ځینې نورو کاروونکو بیا دغه ویډیو ستایلې چې د کورني ژوند په تړاو خپره شوې. د ترکیې محافظه کارې یني اکیت ورځپاڼې د دغې ویډیو پیغام 'له معانا 'ډک بللی.