قزاقستان کې الوتکه غورځېدلې او ۱۵ کسان پکې وژل شوي

قزاقستان د انځور حقوق AFP

په قزاقستان کې یوه الوتکه چې ۹۸ مسافر او د الوتکې کارکوونکي پکې سپاره وو، غورځېدلې ده. تر اوسه د ۱۵کسانو د وژل کېدو خبر تایید شوی دی.

د قزاقستان د کورنیو چارو وزارت ویلي، د دوی لومړني معلومات په ډاګه کوي چې په وژل شویو کې شپږ ماشومان هم شامل دي.

د چارواکو په خبره، د "بېک ایر" هوايي شرکت اړوند الوتکه نن (مرغومی ۶/ډسمبر ۲۷) له الماتای هوايي ډګره له الوتنې څو شیبې وروسته غورځېدلې ده.

د اته ماشومانو په ګډون لږ تر لږه ۳۵ کسان نژدې روغتونونو ته لېږدول شوي دي.

د رویټرز خبري اژانس یو خبریال چې په سیمه کې و وايي، د سیمې هوا له غباره ډکه وه.

الوتکه له الماتای نه د ددې هېواد بل ښار نورسلطان (استانا) پر لور روانه وه. د الوتکې د سقوط لامل تراوسه معلوم نه دی.

په دې وسیله کې د غږ اوريدل او ویډیو لیدنه شونې نه ده.
د لوېدلې الوتکې ویډیو

د هوايي ډګر چارواکو ویلي چې ځینې کسان ژوندي پاتې دي. د دوی په خبره په الوتکه کې ۹۳ مسافر او ۵ د الوتکې خدمه وه.

په ځینو خپرو شویو ویډیوګانو کې ښکاري چې سیمې ته او ورژونکي ور رسېدلي دي او د یوې مېرمنې غږ اورېدل کیږي چې امبولانس غواړي.

چارواکو ویلي د پېښې د لامل د معلومولو لپاره به یو کمېسیون وټاکي.

د قزاقستان ولسمشر قاسم جومارت له قربانیانو سره خپله "ژوره خواشیني" ښودلې او زیاته کړې یې ده چې اړوند مسؤلینو سره به قانوني چلند وشي.

ورته مطالب