مصر پخوانی پوځي افسر اعدام کړ

هشام عشماوي

د عکس سرچینه، LIBYAN NATIONAL ARMY

په مصر کې پخواني پوځي هشام عشماوي له ترهګرۍ سره اړوندو مسلو کې د ښکېلتیا په جرم اعدام شوی دی.

د مصر د پوځ ویاند پر رسمي فېسبوک لیکلي، پخوانی افسر او "ترهګر" هشام عشماوي د چارشنبې "په ګهیځ اعدام شو."

وړاندې په مصر کې یوې محکمې د عشماوي د اعدام حکم کړی و. پر نوموړي دوو پېښو کې د ترهګرۍ تور لګول شوی و.

عشماوي - چې په ابو عمر الماهجر هم مشهور و، له پوځه د دیني سخت دریځۍ له کبله ایستل شوی و، چې تېر کال د لیبیا ختیځ درنه کې د لیبیا ملي پوځ ونیو.

پر نوموړي تور و چې پولیسو ته یې د ۲۰۱۴ کال روژه میاشت کې کمین نیولی و او لږترلږه ۲۲ پوځيان پکې ووژل شول.

پر نوموړي د دقهلیه ولسوالۍ پر ودنۍ او المنیا کې پر قبطیانو د برید تورونه هم لګول شوي وو، چې لږترلږه ۲۹ کسان پکې ووژل شول.

عشماوي د مصر توپان په نامه ځواکونو کې افسر و چې په ۲۰۰۷ کال هم پوځي محکمې ته له دې کبله حاضر کړل شوی و چې ګنې سخت دریځی دی او پوځيان بغاوت ته هڅوي. همدا وو چې په ۲۰۱۱ کال له پوځه د تل لپاره وشړل شو.

د عکس سرچینه، FACEBOOK

د عکس تشریح،

پر نوموړي تور و چې پولیسو ته یې د ۲۰۱۴ کال روژه میاشت کې کمین نیولی و او ترلږه ۲۲ پوځيان پکې ووژل شول.

عشماوي لیبیا ته وتښتېد او په درنه ښار کې مېشت شو، خو هلته د خلیفه حفتر "د لیبیا ملي پوځ" په نامه ځواکونو د ۲۰۱۸ په اکتوبر میاشت کې ونیو او په تېره مې میاشت کې یې مصر ته وسپاره.

رپوټونه وايي، نوموړی داسې مهال ونیول شو، چې مېرمن او د محمد رفاعي سرور په نامه د یوه بل قومندان بچیان هم ورسره وو.

ښاغلی سرور په ۲۰۱۷ کال د حفتر ځواکونو وژلی و.

د مصر ولسمشر عبدالفتاح سیسي هغه مهال د عشماوي د نیول کېدو او مصر ته یې د سپارل کېدو هرکلی کړی و.

د ادعا له مخې، په ۲۰۱۵ کال، عشماوي له القاعده شبکې سره تړلې "المرابطون" نومې ډله جوړه کړه، چې دوه کاله وروسته پرې پر عیسویانو د هغه برید تور ولګول شو چې لږترلږه ۲۸ کسان پکې ووژل شول.