کورونا وېروس: د وبا خپرېدو له خبرداري سره سره د توکمپالنې ضد مظاهرې

مظاهرې

د عکس سرچینه، Getty Images

د عکس تشریح،

د نړۍ په یو شمېر هېوادونو کې د کورونا له خبرداري سره سره د توکمپالنې ضد مظاهرې شوې

د برتانیا په ګډون د نړۍ په یو شمېر هېوادونو کې د کورونا وېروس خپریدو له خبردراي سره سره ګڼ خلک د توکمپالنې او پولیسو ظلم پر ضد مظاهرې کوي. په واشنګټن ډي سي، واراسايي ماڼۍ ته څېرمه او د مادرید پراډو موزیم هغه ځایونه دي، چې ویل کېږي، دغه ډول مظاهرې پکې کېږي.

د واشنګټن ډي سي پولیسو مشر د شنبې ورځې مظاهرې په تړاو وايي چې 'ښايي دا زموږ د ښار له ډېرو لویو مظاهرو یوه وي'. د ې ته ورته احتجاجونه د نړۍ په یو شمېر نورو هېوادونو کې هم کېږي.

د برتانیا پلازمېنه لندن کې د پارلمان مخې ته ګڼ شمېر خلک داسې حال کې یو ځای شوي وو، چې د کورونا وېروس خپریدو مخنیوي لپاره له خلکو غوښتل شوي چې په ګڼه ګوڼه کې له برخه اخیستو ډډه وکړي.

بل لور ته د روغتیا نړیوال سازمان وايي، په عامه ځایونو کې د ماسک کاروول د کورونا وېروس خپریدو مخنیوي کې مرسته کولای شي.

د عکس سرچینه، Twitter/christinamobley via PA Media

د عکس تشریح،

د لندن په ګډون یو شمېر ښارونو کې د توکمپالنې ضد مظاهرې شوې

هند کې په تېرو ۲۴ ساعتونو کې د کورونا وېروس نژدې ۱۰۰ زره ناورغان ثبت شوي دي، چې ورسره دغه هېواد د ناروغانو ټولټال شمېر له پلوه له ایټالیا هم مخکې شو. هند اوس د ناروغانو شمېر له پلو په نړۍ کې شپږم ځای خپل کړی.

دا مهال په دغه هېواد کې د کورونا ۲۳۶۶۵۷ ناروغان ثبت شوي او ۶۶۴۹ کسان له همدې کبله مړه شوي دي.

رپوټونو کې ویل شوي، د دغه هېواد په ګڼ مېشتي ښار ممبۍ کې روغتونونه په ټپه درېدو ته نژدې شوي او دغه راز په پلازمېنه ډیلي کې د نویو ناروغانو بستري کېدو ته ځای په ختمېدو دی.

د عکس سرچینه، AFP

د عکس تشریح،

د روغتیا نړیوال سازمان وايي، په عامه ځایونو کې د ماسک کارول ګټور کېدای شي

بل لور ته د ایټالیا بهرنیو چارو وزیر لویګي دي مایو وايي، هیله من دی چې نور اروپايي هېوادونه به د ایټالویانو لپاره د جون میاشتې له ۱۵ وروسته د تګ راتګ لپاره پولې پرانیزي.

ایټالیا د جون له درېیمې راهیسې د اروپایانو لپاره خپلې پولې پرانیستې دي، خو ډېری نورو اروپايي هېوادونو د اروپایانو پر مخ خپلې پولې تړلې دي. ایټالیا د کورونا ناروغۍ له کبله د مړینې برخه کې څلورم ځای لري.

د جان هاپکنزو پوهنتون د شمېرو له مخې ایټالیا کې تر اوسه د دغې ناروغۍ له کبله ۳۳ ۷۷۴ کسان مړه شوي دي.

بل لور ته اروپايي ټولنې له غړو هېوادونو غوښتي چې د جون له ۱۵ وروسته پر قرنطین کې نرمښت راولي او له پاسپورټه پرته خلکو ته اجازه ورکړي چې نورو اروپايي هېوادونو ته سفر وکړي.