واشينګټن: د قطر يو ډيپلومات نيول شوی دی

په متحده ايالتونو کې د قطر يو ډيپلومات له هغه وروسته ونيول شو چې دده د سپرلۍ په الوتکه کې امنيتي زنګ و کړنګېده .

امريکايي چارواکو ويلي دوو اف 16 جيټ الوتکو د امريکا دهوايي کرښې دغه الوتکه تر هغه مهاله څارله او ساتله چې ددينفر په هوايي ډګر کې په خوندې توګه کېناستله .

لومړنيو راپورونو ويلي يوه سړي چې نوم يې نه دی اخيستل شوی هڅه کوله په خپلو بوټونو کې اور بل کړي .

خو وروسته چارواکو و ويل چې چاودېدونکي توکي نه دي موندل شوي او دغه سړي ظاهرا هڅه کوله چې د الوتکې په تشناب کې سګريټ وڅکوي .

دغه سړی وروسته وپېژندل شو چې د قطر يو ديپلومات دی او په واشينګټن کې يې د خپل هېواد په سفارت کې کار کاوه .

په واشينګټن کې د قطر سفارت په يوه ويناپاڼه کې وويل د يپلومات علي بن فهد الهاجري په هېڅ کومه ګواوښکونکې چاره کې لاس نه لري او دا په ټوله کې يوه تېروتنه وه .

سفر

سفارت ويلي دغه ډيپلومات په يوه سوداګريز سفر روان و.

دغه الوتکه چې تر 160 زيات مساپر او عمله پکې سپارل ول ، د دنفر پر نړيوال هوايي ډګر په داسې حال کې راکښته شوه چې د ټلويزيوني انځورونو له مخې يې شاوخوا ته د امنيتي ځواکونو ګاډي ولاړ او دايې کلابنده کړې وه .

د امريکا د ترانسپورټي امنيت ادارې ويلي دوی له هغه وروسته لاس په کار شول چې له واشينګټن څخه دنفر ته روانې، د امريکا د متحده ايالتونو د هوايي کرښې د 663 شمېرې اولوتنې په اړه فضايي فدرالي ادارې خبر ورکړ چې يو مساپر په الوتکه کې سرګردانه ګرزي .

دا پېښه له هغه يوازې څو مياشتې وروسته کېږي چې يوه نايجيريايي سړي د ادعا له مخې هڅه وکړه چې امريکا ته په تلونکې مساپر ووړونکې الوتکه کې بمي چاودنه وکړي .